ԵՐԵՎԱՆ, 20 սեպտեմբերի — Sputnik, Արմենուհի Մխոյան. Գյումրիում ակտիվ նախապատրաստական եռուզեռ է, քաղաքում տոնական օրվա վերջին աշխատանքներն են ընթանում: Արդեն այսօրվանից որոշ փողոցներ փակ են: Անկախության 28 ամյակին նվիրված ցուցանակներն ու դրոշները զարդարում են քաղաք տանող ճանապարհն ու քաղաքի կենտրոնական հատվածը:
Այն փողոցներում, որտեղ նախատեսված են համերգներ, տեղադրվում են բեմեր, իսկ գլխավոր՝ «Վարդանանց» հրապարակի բեմի տեղադրման աշխատանքներն արդեն ավարտվել են:
Քաղաքի որոշ հատվածներում տեղադրված են նաև բիո զուգարաններ, նման բան Գյումրիում երբեք չի եղել:
Հյուրերից շատերն արդեն ժամանել են: Դեռ օրեր առաջ քաղաքի բոլոր հյուրանոցների և հյուրատների համարներն արդեն ամրագրված էին, սակայն ինչպես գյումրեցիներն են խոստանում՝ «Գյումրի գուկաս, դուսը չես մնա»:
Իսկ ինչ է սպասվում գյումրեցիներին և քաղաք այցելած հյուրերին։ Գյումրու տարբեր հատվածներում վաղը` սեպտեմբերի 21–ին, կլինեն երաժշտական հարթակներ՝ էլեկտրոնային, փոփ, ռոք, դասական, հայկական ժողովրդական երաժշտության սիրահարների համար: Գյումրեցի հայտնի արհեստավորների ու արվեստագետների աշխատանքները կցուցադրվեն Շահումյան փողոցում, իսկ Հայաստանի մարզերն առանձին տաղավարներով կներկայանան Ռուսթավելի փողոցում։
«Հոկտեմբեր» կինոթատրոնում տեղի կունենա գյումրեցի կինոռեժիսոր Սոնա Սիմոնյանի «Մեծ ակնկալիքներ» վավերագրական ֆիլմի ցուցադրությունը, օրվա ընթացքում բաց կլինեն բոլոր թանգարանները: Տոնական օրը կամփոփվի գալա համերգով, որը կմեկնարկի ժամը 19։00-ից, Գյումրու Վարդանանց հրապարակում։
Ամենաճոխ բեմը` նվազագույն գներով. ինչքան կարժենա Անկախության 28-ամյակը Գյումրիում տոնելը
Համերգին ելույթ կունենան հայ և արտասահմանցի արտիստներ, մասնավորապես, էլեկտրոնային երաժշտության ժանրում հայտնի Dole & Kom գերմանական խումբը, ինչպես նաև գյումրեցիներին ու քաղաքի հյուրերին իրենց կատարումներով կուրախացնի ինդի փոփ ժանրում հանդես եկող, Գրեմմի մրցանակի առաջադրված ամերիկյան Capital Cities խումբը, որն աշխարհին հայտնի է «Safe and Sound» մեգահիթով։
Սեպտեմբերի 21-ին Հայաստանի Հանրապետության անկախության 28 ամյակի միջոցառումների հիմնական մասը՝ «Գուկաս Գյումրի» կարգախոսով կանցկացվի Հայաստանի 2–րդ քաղաքում։
Գյումրու տարբեր հատվածներում տեղի կունենան բազմաժանր համերգներ. երաժշտարվեստի լեզվով բազմահազար ունկնդիրներին տոնական մթնոլորտում կփոխանցվի անկախության, պետականության, միասնության կարևորագույն ուղերձները: