ԵՐԵՎԱՆ, 20 սեպտեմբերի – Sputnik. Հայաստանի Հանրապետության սանիտարահիգիենիկ և համաճարակային վիճակն առավել քան մտահոգիչ է: Sputnik Արմենիա մուլտիմեդիոն մամուլի կենտրոնում կայացած ասուլիսի ժամանակ այս մասին ասաց ՀՀ կառավարությանն առընթեր Սննդամթերքի անվտանգության տեսչական մարմնի նախկին պետ և «Մեկ առողջություն» կոալիցիայի առաջնորդ Գրիգոր Գրիգորյանը:
«Այս տարի սննդային թունավորումների մասսայական բռնկումներ են լինում, մասնավորապես, տարվա սկզբից մինչև օգոստոս 2739 սննդային թունավորման դեպք ենք ունեցել»,-ասաց նա:
Իսկ թե նախորդ տարվա համեմատ սննդային թունավորման դեպքերն ավելացել են, թե ոչ, Գրիգորյանը նշեց՝ չի կարող ասել:
Նա հայտնեց նաև, որ այս տարվա սկզբից մինչ օգոստոս 2983 զոոնոզ հիվանդություն է գրանցվել, սակայն արդյոք այս դեպքերն էլ ավելացել են, թե ոչ, Գրիգորյանը կրկին չհայտնեց:
Սննդամթերքի անվտանգության տեսչական մարմնի նախկին պետը նշեց, որ Երևանում լեյշմանիոզի (պարազիտային հիվանդություն) բռնկման վտանգ կա, քանի որ մայրաքաղաքում աղբը գրեթե չեն հավաքում:
Դեղորայքային թունավորման դեպքերն այս տարի ավելացել են. ԱՆ ցուցանիշներ է ներկայացրել
Գրիգորյանի խոսքով՝ պատկան մարմինները բնակչությունից թաքցնում են հիվանդացության դեպքերը:
Առողջապահության նախարարությունից Sputnik Արմենիային հայտնեցին, որ նախարարությունը բոլոր դեպքերի մասին մշտապես տեղեկացնում է:
Սուր թունավորում. Գյումրիում երկու անչափահասի են հոսպիտալացրել
Ըստ առողջապահության նախարարության տվյալների (ամսական ներկայացված հաշվետվությունների)` 2019–ի հունվարից մինչև սեպտեմբեր սննդային թունավորումների 46 դեպք է գրանցվել, այդ թվում՝ բոտուլիզմի 9, սնկից թունավորման 31 և ստաֆիլոկոկային թունավորման 28 դեպք։ Ինչ վերաբերում է զոոնոզ հիվանդություններին, ապա ընթացիկ տարվա հունվարից մինչև սեպտեմբեր գրանցվել է սիբիրյան խոցի 10, բրուցելոզի 174, լեպտոսպիրոզի 1, լեյշմանիոզի 14 դեպք։