Կարեն Վերանյանը նշում է, որ այդ զորավարժությունները պլանային են և կարող են իրականացվել տարվա ընթացքում մինչև 10 անգամ։
«Զորավարժություններին մեծ թվով զինծառայողների և զինտեխնիկայի ներգրավվածությունը թույլ է տալիս ասել, որ Ադրբեջանը փորձում է մարտահրավեր նետել ընդհանուր տարածաշրջանի կայունությանն ու խաղաղության պահպանմանը»,-կարծում է Կարեն Վերանյանը։
Ռազմական փորձագետն, այդուհանդերձ չի կարծում, թե խոշորածավալ զորավարժությունների անցկացումն անպայմանորեն պետք է կապել պատերազմի նախապատրաստվելու գործընթացի կամ պատերազմի մեկնարկի հետ։
«Միևնույն ժամանակ, ոչինչ բացառել չի կարելի, քանի որ 2016 թվականի ապրիլյան ռազմական գործողություններից առաջ սահմանային լարվածությունը համեմատաբար հանգիստ էր, այդուհանդերձ տեղի ունեցավ լայնածավալ հարձակում»,–հիշեցնում է Կարեն Վերանյանը։
Ռազմական փորձագետի խոսքով` կարևոր է նաև հասկանալ, որ Բաքուն փորձում է օգտագործել հայաստանյան ներքաղաքական, հասարակական կյանքի ցանկացած լարված իրավիճակ` նպատակ ունենալով հավելյալ ռազմաքաղաքական, բարոյահոգեբանական ճնշումներ բանեցնել Հայաստանի վրա։
«Պետք է արձանագրել, որ նույն ձեռագիրն է, և Ադրբեջանի իշխանությունների վարքագծում ոչինչ չի փոխվել»,-փաստում է ռազմական փորձագետը։
Հիշեցնենք` Ադրբեջանում այս օրերին ընթանում են լայնամասշտաբ զորավարժություններ, որոնցում ներգրավված են մինչև 10 հազար զինծառայող, 100 միավոր տանկ ու զրահամեքենա, տարբեր տրամաչափի 120 հրթիռահրետանային համակարգեր, ականանետներ, 20 միավոր ռազմական ինքնաթիռ ու անօդաչու թռչող սարքեր, տեղեկացնում է այդ երկրի պաշտպանության նախարարության պաշտոնական կայքը։ Տարբեր ստորաբաժանումների և զորատեսակների մասնակցությամբ անցկացվող զորավարժությունները կամփոփվեն սեպտեմբերի 20-ին։