ԵՐԵՎԱՆ, 16 սեպտեմբերի — Sputnik. Ռուսական կողմը ՀԿԵ–ում իրականացված ստուգումների ոչ բոլոր արդյունքների հետ է համաձայն։ Այս մասին այսօր Վանաձորում լրագրողների հետ հանդիպմանը հայտարարեց ՀՀ վարչապետ Նիկոլ Փաշինյանը` նշելով, որ ռուսական կողմի հետ աշխատանքները շարունակվում են։
«Եթե հընթացս պարզվի, որ քրեական պատասխանատվության ենթակա մարդիկ կան, նրանք կենթարկվեն։ Բայց մեր նպատակն է, որ ՀՀ պետական շահերը պաշտպանվեն։ Նկատի ունենք, որ 45 կամ 48 թվականի ժանգոտած շարժակազմերը փոխարինվեն ժամանակակից շարժակազմերով, ինչը ենթադրվում էր ՀԿԵ–ի հիմնադրման ժամանակ»,– ասաց Փաշինյանը։
Հիշեցնենք` 2018թ–ին ՀՀ քննչական կոմիտեն հայտարարեց, որ քրեական գործ է հարուցվել «Հարավկովկասյան երկաթուղի» ՓԲԸ–ում արձանագրված առերևույթ չարաշահումների դեպքով։
Նախաքննությամբ պարզվել էր, որ ՀՀ կառավարության 2008թ.–ին ՀՀ տրանսպորտի և կապի նախարարության, «Հարավկովկասյան երկաթուղի» փակ բաժնետիրական ընկերության և «Ռուսական երկաթուղիներ» բաց բաժնետիրական ընկերության միջև կնքվել էր «Հայկական երկաթուղու համակարգը «Ռուսական երկաթուղիներ» բաց բաժնետիրական ընկերության կողմից ստեղծված «Հարավկովկասյան երկաթուղի» փակ բաժնետիրական ընկերությանը փոխանցելու մասին» կոնցեսիոն պայմանագիր։
Պայմանագրով շուրջ 849մլն. ՀՀ դրամով Կոնցեսիոների սեփականությանն է փոխանցվել 2447 միավոր շարժակազմը՝ պայմանագրի ավարտի պահին Կոնցեդետի կողմից հետգնման նախապատվության պայմանով:
«ՀԿԵ»-ն պարտավորվել էր 174,5 մլրդ դրամի (575 մլն. ԱՄՆ դոլար) ներդրում կատարել։
Հայաստանի երկաթուղին կառավարում է ՀԿԵ–ն, չենք քննարկում այն փոխելու հարցը. Փաշինյան
Հարուցված քրեական գործով տվյալներ էին ձեռք բերվել ՀԿԵ–ում թույլ տրված չարաշահումների մասին։
Բոլոր հանգամանքները պարզելու համար քննիչի որոշմամբ նշանակվել էր ստուգում՝ ՀՀ ֆինանսների նախարարության ֆինանսաբյուջետային վերահսկողության տեսչության մասնագետներին հանձնարարելով «Հարավկովկասյան երկաթուղի» ՓԲԸ-ում իրականացնել այն՝ 2008-2018թթ. իրականացված 110 մլրդ. ՀՀ դրամի ներդրումների արդյունավետությունը և իրավաչափությունը պարզելու համար: