ԵՐԵՎԱՆ, 11 սեպտեմբերի — Sputnik. Մոսկվան երախտապարտ է Երևանին` Լեհաստանում Հայրենական մեծ պատերազմի 80-ամյակին նվիրված միջոցառումներին մասնակցելուց հրաժարվելու համար։ Այսօր Երևանում ՄՊՀ–ի մասնաճյուղում անցկացված «Խաղաղություն Համաշխարհային երկրորդ պատերազմի նախօրեին» գիտաժողովի ժամանակ այս մասին ասաց ՀՀ–ում ՌԴ դեսպան Սերգեյ Կոպիրկինը։
Մենք սատարում ենք Հայաստանի դիրքորոշումը. Զախարովան` Փաշինյանի Լեհաստան չմեկնելու մասին
Հայրենական մեծ պատերազմի 80-ամյակին նվիրված միջոցառումները Լեհաստանում անցկացվեցին սեպտեմբերի 1-ին։ Լեհաստանը միջոցառումներին չէր հրավիրել Ռուսաստանի պատվիրակությանը, սակայն հրավիրել էր ՆԱՏՕ–ի, ԵՄ–ի իր դաշնակիցներին, այդ թվում Գերմանիային և «Արևելյան գործընկերության» երկրներին։ ՀՀ արտգործնախարար Զոհրաբ Մնացականյանը հայտարարել էր, որ երկրի ղեկավարությունը չի մասնակցի այդ միջոցառումներին։ Նրա խոսքով` Համաշխարհային երկրորդ պատերազմի հետ կապված հարցը Հայաստանի համար սկզբունքային է։
«Մենք երախտապարտ ենք հայկական կողմին այդ միջոցառումներին չմասնակցելու վերաբերյալ սկզբունքային դիրքորոշման համար։ Սա հերթական անգամ վկայում է և ապացուցում, որ Հայաստանն ու հայ ժողովուրդը հիշում են իրենց նախնիների սխրանքները և հարգում զոհված հերոսների հիշատակը», – ասաց դեսպանը։
Նրա խոսքով` հայ ընկերների և եղբայրական մյուս հանրապետությունների այս քայլը ևս մեկ անգամ ապացուցում է, որ Հայրենական մեծ պատերազմում հաղթանակն ընդհանուր էր, իսկ կոնյունկտուրային շահեր օգտագործելով` երկրների միջև պառակտություն մտցնելու փորձերը ձախողման են դատապարտված։
Դեսպանը նաև հայտարարեց, որ Հայաստանի հետ ռազմավարական դաշնակցության վերաբերյալ Մոսկվայի տրամադրվածությունն անփոփոխ է։ «Մենք ռազմավարական գործընկերներ ենք, դաշնակիցներ, եղբայրական երկրներ և եղբայրական ժողովուրդներ։ Ռուսաստանի դիրքորոշումը ոչ մի դեպքում չի փոխվել։ Որքան հասկանում եմ, դա համապատասխանում է նաև Հայաստանի ղեկավարության դիրքորոշմանը», – ասաց Կոպիրկինը լրագրողներին։
Երևանում գիտաժողովը կազմակերպել է Հայաստանում ՌԴ դեսպանատունը, ԳՄՌԿ–ն, «Տարածաշրջանային գիտակրթական կենտրոնների միավորում» ՊՈԱԿ–ը` ՄՊՀ–ի երևանյան մասնաճյուղի մասնակցությամբ։