ԵՐԵՎԱՆ, 11 սեպտեմբերի – Sputnik.Հայաստանում գրանցված աշխատողների թիվն առաջին անգամ գերազանցել է 600 հազարը։ Այս մասին այսօր խորհրդարանում կառավարության անդամների հետ հարցուպատասխանի ժամանակ ասաց ՀՀ վարչապետ Նիկոլ Փաշինյանը։
«2019 թվականի հունվար–հունիսին «Զինծառայողների ապահովագրության հիմնադրամի» փոխանցումները գերազանցել են նախորդ տարվա ցուցանիշը 347 միլիոն 800 հազար դրամով (9,6%)։ Աճը պայմանավորված է պայմանագրային զինծառայողների քանակի ավելացումով», – ասաց Փաշինյանը։
Նրա խոսքով` նշված ժամանակահատվածում գրանցված գործազուրկների միջին թիվը նախորդ տարվա ցուցանիշի համեմատ նվազել է 6,4%–ով։
Հուլիսին տնտեսական ակտիվության ցուցանիշն աճել է. Փաշինյանը «հրաշալի թվեր» է հայտնել
«Ուզում եմ ձեզ տեղեկացնել նաև, որ Հայաստանի Հանրապետության պատմության մեջ առաջին անգամ գրանցված աշխատողների թիվը գերազանցել է 600 հազարը։ Հուլիսի 31–ի վերջին տվյալներով՝ այն կազմել է 604 հազար»,- ասաց Փաշինյանը։
2018 թվականի մայիսին գրանցված աշխատակիցների թիվն աճել է 63 հազարով։ Այս տվյալները ՊԵԿ–ին տրամադրել են հենց գործատուները։