ԵՐԵՎԱՆ, 9 սեպտեմբերի — Sputnik. Դատական ակտերի հարկադիր կատարման ծառայությունը (ԴԱՀԿԾ) չի կարողանա մարտական հերթապահություն իրականացնող զինծառայողների պարտքի դիմաց նրանց աշխատավարձի 30 տոկոսից ավելին պահել. օրենքի համապատասխան փոփոխությունները քննարկում են ԱԺ–ում։
«Դատական ակտերի հարկադիր կատարման մասին» օրենքի փոփոխությունները ենթադրում են, որ ԴԱՀԿԾ–ն չի կարողանա առաջնագծում մարտական հերթապահություն իրականացնող զինվորականներից պահել ամսական աշխատավարձի և պարգևավճարների 30%–ից ավելին մինչև բռնագանձվող գումարի վերջնական մարումը։
Դրա համար բավարար կլինի տեղեկանք ներկայացնել զորամասից, որը պարտավոր են տրամադրել երեք ամիսը մեկ։
Ենթադրվում է, որ օրենքը հակառակ ուժ չի ունենա, այսինքն կանդրադառնա բռնագանձման այն դեպքերին, որոնք ուժի մեջ են մտնում միայն դրա ընդունումից հետո։
«Ես առաջարկում էի այնպես անել, որ անհնար լիներ բռնագանձել աշխատավարձի 10%–ից ավելին։ Սակայն կառավարության հետ բանակցությունների արդյունքում մենք որոշեցինք կանգ առնել 30 տոկոսի վրա», – ասաց օրինագծի հեղինակներից մեկը` ԲՀԿ պատգամավոր Սերգեյ Բագրատյանը։
Նրա կարծիքով` դա կթեթևացնի այն զինվորականների սոցիալական վիճակը, որոնց աշխատավարձային հաշիվները գտնվում են կալանքի տակ։
Բագրատյանի խոսքով` մշակման համար հիմք է ծառայել մի դեպք, որին ականատես են եղել Խնձորուտ գյուղում․ զինծառայողը 4 ամիս «նիսյայով» է գնումներ կատարել խանութից, քանի որ ԴԱՀԿ-ն ամբողջությամբ արգելափակել է նրա հաշիվը, և զինծառայողը չի կարողացել հոգալ իր կենցաղային կարիքները։
Որքան են բարձրացել զինծառայողների աշխատավարձերը. Փաշինյանը թվեր է հրապարակել
«Առաջնագծում ծառայող զինվորը չպետք է մտքով իր թիկունքում անվստահություն ունենա: Նա պետք է կարողանա ուղիղ կենտրոնանալ սահմանի հակառակ հատվածի վրա»,– ասաց նա։
«Իմ քայլը» դաշինքի պատգամավոր Հայկ Գևորգյանն իր հերթին մտավախություն հայտնեց, որ բանկերն այս որոշումից հետո կարող են դժվարացնել մարտական հերթապահություն իրականացնող զինծառայողներին վարկեր տրամադրելու գործընթացը և առաջարկեց մտածել դրանից խուսափելու տարբերակների մասին։
Եվս մեկ զորամասում ավելի համեղ ճաշեր կուտեն. Փաշինյանը տեսանյութ է հրապարակել