ԵՐԵՎԱՆ, 4 սեպտեմբերի – Sputnik. Բարձրագույն դատական խորհրդի նախագահ Ռուբեն Վարդազարյանը կարծում է, որ երկրորդ նախագահ Ռոբերտ Քոչարյանին վերաբերող գործով դատավարության ընթացքում դրսևորվում է դատարանի վրա ճնշելու փորձ, բայց նրա համոզմամբ՝ դա չի կարող ազդել արդարադատական պրոցեսի վրա: Նա այս մասին ասաց այսօր լրագրողների հետ հանդիպմանը։
Լրագրողները հետաքրքրվեցին` ինչպե՞ս կմեկնաբանի երկրորդ նախագահ Ռոբերտ Քոչարյանի պաշտպանական կողմի հայտարարությունները, որ իշխանությունն ահռելի ճնշումներ է գործադրում դատական համակարգի վրա: Ռուբեն Վարդազարյանը նախ նկատեց, որ «ահռելի» բառը չափազանցված է:
«Սակայն գտնում եմ, որ ոչ թե ճնշում է իրականացվում, այլ փորձ է իրականացվում ճնշել, ընդ որում, ոչ միայն իշխանական թևից»,– ասաց նա։
Վարդազարյանը նշեց, որ երկրորդ նախագահի գործի շրջանակում հասարակությունը երկու մասի է բաժանվել։
«Մամուլով տեսնում ենք, ես էլ ձեզ հետ, դատարանի առջև բողոքի ակցիաներ են իրականացնում և՛ պաշտպանները, և՛ հակառակորդները, փորձում են վանկարկել ինչ-որ բառեր, բառակապակցություններ, դարձվածքներ, որոնք որ ես գնահատում եմ, որ դա փորձ է ճնշման: Բայց վստահ եմ, որ չկա որևէ դատավոր, որը կարող է արդարադատություն իրականացնել՝ հաշվի առնելով դատարանի առջև կանգնած, բողոքի ակցիա իրականացնող մարդկանց բառակապակցությունները»,– ասաց նա:
Պուտինի` Քոչարյանին ուղղված շնորհավորանքում որևէ արտառոց բան չկա. դեսպան Տողանյան
ԲԴԽ նախագահը նկատեց, որ դատավորները շատ ժամանակ չեն էլ կարող լսել այդ վանկարկումները, քանի որ ձայները դահլիճ չեն հասնում: Ամեն դեպքում, նրա համոզմամբ, դա որևէ կերպ չի կարող ազդել արդարադատական պրոցեսի վրա:
Լրագրողները փորձեցին ճշտել, թե Ռուբեն Վարդազարյանն ի՞նչ նկատի ունի՝ իշխանական թև ասելով։
«Ես ի՞նչ ասացի: Ասացի՝ կա դատարանների վրա ճնշելու փորձ: Ընդամենը փորձ, ոչ թե ճնշում: Երկու կողմը՝ Քոչարյանի գործով, երկրորդ նախագահի գործով կան պաշտպաններ, որոնք պաշտպանում են երկրորդ նախագահին և որոնք ընդդիմախոսում են: Դա ես գնահատում եմ որպես ճնշման փորձ»,– ասաց նա։
Վարդազարյանը ևս մեկ անգամ շեշտեց` դա ընդամենը փորձ է, ճնշում չէ։
Հիշեցնենք, որ 2018 թվականի հուլիսի 26-ին Մարտի 1-ի գործով Հատուկ քննչական ծառայությունում քննվող քրեական գործով Հայաստանի երկրորդ նախագահ Ռոբերտ Քոչարյանին մեղադրանք է առաջադրվել ՀՀ քրեական օրենսգրքի 300.1-ին հոդվածի 1-ին մասով այն բանի համար, որ նա այլ անձանց հետ նախնական համաձայնությամբ տապալել է Հայաստանի Հանրապետության սահմանադրական կարգը: