ԵՐԵՎԱՆ, 4 Սեպտեմբեր — Sputnik. ՀՖՖ-ն Եվրոպայի 2020 թվականի առաջնության սեպտեմբերի 5-ին և 8-ին կայանալիք ընտրական խաղերից առաջ հրապարակեց հավաքականի կազմում ընդգրկված 25 ֆուտբոլիստների անունները, որոնք նախապատրաստվում են Իտալիայի, ապա նաև Բոսնիա և Հերցոգովինայի հավաքականի դեմ խաղերին:
Հավաքականի գլխավոր մարզիչ Արմեն Գյուլբուդաղյանցը լրագրողների հետ զրույցում հայտնեց, թե ինչու որոշ հայտնի ֆուտբոլիստներ հավաքական չեն հրավիրվել:
Ըստ Գյուլբուդաղյանցի` նրանցից մեկը Յուրա Մովսիսյանն է, որի վնասվածքը թեև ապաքինվել է, սակայն մարզավիճակն այն չէ։
«Նրա վնասվածքն արդեն լիովին ապաքինվել է, բայց դեռևս թիմ չունի, հետևաբար, նաև խաղային պրակտիկա: Այս պայմաններում դժվար է խոսել նրա մարզավիճակի մասին ու հրավիրել հավաքական»,- նշեց նա:
Վահան Բիչախչյանը ևս ազգային հավաքականի կազմում ընդգրկված չէ։
«Տաղանդավոր ֆուտբոլիստ է ու ես հավատում եմ, որ նա մեր հավաքականի ավագն է: Այս հավաքի ընթացքում 20-ամյա ֆուտբոլիստը մեզ հետ մեկ օր մարզվել է: Չեմ բացառում, որ մոտ ապագայում նա կդառնա արդեն հավաքականի լիարժեք ֆուտբոլիստ»,- ասաց Գյուլբուդաղյանցը:
Հաջորդը Նորբերտո Բրիասկո Բելեկյանն է, ում նույնպես Գյուլբուդաղյանցը լավագույնների շարքին է դասում։
Գյուլբուդաղյանցն ասաց` որն է մեր հավաքականի խնդիրը. Հայաստան–Իտալիա խաղը թեժ է լինելու
«Ես նրան դիտարկում էի, որպես կենտրոնական հարձակվող, բայց դա նրա մոտ չստացվեց: Իր թիմում նա խաղում է եզրային հարձակվողի դիրքում, իսկ եզրերում մենք լավ ֆուտբոլիստներ ունենք»,- հայտնեց գլխավոր մարզիչը:
Գոռ Մալաքյանի մարզավիճակը վատը չէ, սակայն էմոցիաները ֆուտբոլիստին հաճախ են խանգարում։
«Գոռը շատ լավ ֆուտբոլիստ է, ու լավ էլ մարզավիճակում է գտնվու,, բայց դեռևս չի կարողանում զսպել իր էմոցիաները, ու անընդհատ դեղին քարտեր է ստանում: Եթե կարողանա լրացնել այդ բացը, ապագայում մեր ընտրանուն շատ պետք կգա»,- նշեց Գյուլբուդաղյանցը:
Գլխավոր մարզչի առանձնացրած ֆուտբոլիստների լավագույն հնգյակը եզրափակում է Արտյոմ Սիմոնյանը։
«Արտյոմը շատ լավ է սկսել Հայաստանի առաջնությունում, բայց նա խաղում է այն դիրքում, որտեղ Հենրիխ Մխիթարյանը։ Այդ դիրքում խաղալու համար հրավիրել ենք նաև Պետրոս Ավետիսյանին և Էրիկ Վարդանյանին»,- եզրափակում է Գյուլբուդաղյանցը:
Գաել Անդոնյա, Արազ Օզբիլիս, Լևոն Հայրապետյան. նրանք ևս կարող էին լավագույնս դրսևորել իրենց ֆուտբոլային հմտությունները, սակայն եղավ այն, ինչ եղավ...
Sputnik Արմենիան ներկայացնում է վերջիններիս ազգային հավաքականի հայտացուցակում չհայտնվելու հնարավոր պատճառները։
«Փյունիկից» մինչև «Ռոմա». քանի միլիոն է «պտտվում» Հենրիխ Մխիթարյանի տրանսֆերների շուրջ
Գաել Անդոնյան(պաշտպան) երկար ժամանակ է`թիմ չուներ և, բնականաբար, մարզավիճակի մասին խոսելն ավելորդ է: Ուրախացանք, երբ տեղափոխվեց «Այաչո», որը խաղում է ֆրանսիական երկրորդ դիվիզիոնում, բայց այնտեղ էլ առայժմ ոչ մի հանդիպման չի մասնակցել:
Արազ Օզբիլիսը հավաքականի առաջատար խաղացողներից է: Երկար ժամանակ խաղային պրակտիկա չուներ: Եվ, հավանաբար, դա է հիմնական պատճառը, որ հավաքականը նրան չի հրավիրել: «Փյունիկի» հետ պայամանագիր կնքելուց հետո Արազն արդեն հաստատ խաղաժամանակ կստանա, այսինքն` այդ դեպքում հավաքական վերադառնալն ավելի ռեալ կդառնա:
Ինչ վերաբերում է Լևոն Հայրապետյանին, ապա նա ևս, «Ալաշկերտից» հեռանալուց հետո, դեռևս թիմ չունի, հետևաբար, խաղային պրակտիկա ևս չկա: