ԵՐԵՎԱՆ, 31 օգոստոսի — Sputnik. «Փյունիկի» և Հայաստանի ազգային հավաքականի կիսապաշտպան Էրիկ Վարդանյանը կարող է դառնալ Մոսկվայի «Լոկոմոտիվի» ֆուտբոլիստ:
Sputnik Արմենիայի տեղեկությունների համաձայն` Էրիկ Վարդանյանը նույնիսկ Մոսկվայում է ու բանակցություններ է վարում «Լոկոմոտիվի» հետ։ Որոշ աղբյուրներ անգամ նշում են, թե ինչ կարժենա Վարդանյանի տրասֆերը, և ինչքան գումար կարող է տարեկան վաստակել հայ ֆուտբոլիստը: Նշվում է, որ Վարդանյանի տեղափոխության համար «Փյունիկը» կստանա մոտ 300 հազար եվրո, իսկ ֆուտբոլիստը տարեկան կարող է վաստակել մինչև 250 հազար եվրո գումար:
Այն որ Վարդանյանի նկատմամբ «Լոկոմոտիվը» հետաքրքրություն էր ցուցաբերում, հայտնի էր վաղուց: Մոսկովյան ակումբի սկաուտները ներկա են գտնվել Եվրոպայի լիգայի որակավորման առաջին և երկրորդ փուլերում «Փյունիկի» անցկացրած հանդիպումներին Գյումրիում: Բացի «Լոկոմոտիվից» Վարդանյանի տեղափոխությամբ հետաքրքրված էր նաև Չեխական «Յաբլոնեցը», որի արգելքը «Փյունիկը» հաղթահարեց Եվրոպայի լիգայի որակավորման երկրորդ փուլում:
Երկար ժամանակ չի պահանջվի, որ հստակեցվի`տեղի կունենա այս տեղափոխությունը, թե ոչ: Նշենք, որ այսօր հայտնի դարձավ, որ Արազ Օզբիլիսը և Դմիտրի Սիչյովը կտեղափոխվեն «Փյունիկ»։ Միգուցե «Փյունիկում» այսպես փորձում են վերականգնել Վարդանյանի կորուստը:
Այս առումով պաշտոնական որևէ ինֆորմացիա դեռևս չկա: Պարզապես, եթե Էրիկ Վարդանյանը տեղափոխվի «Լոկոմոտիվ», ապա հայ ֆուտբոլիստի համար դա կլինի լուրջ փորձություն, ու երկաթուղայինների կազմում հայտնվելու համար մեր խաղացողին շատ մեծ մրցակցություն է սպասում:
Ֆուտբոլիստ Արազ Օզբիլիսը խզել է պայմանագիրը թուրքական «Բեշիքթաշի» հետ