ԵՐԵՎԱՆ, 30 օգոստոսի — Sputnik. «Ֆրեսկո» արդի արվեստի և հոգևոր ֆիլմերի 6–րդ միջազգային փառատոնն ավարտվեց, բայց կազմակերպիչները քաղաքապետարանից նեղացած մնացին:
Այս մասին այսօր փառատոնի փակման արարողությանն ասաց «Ֆրեսկոյի» նախագահ Շահեն Նազարենկոն։
Փառատոնի կազմակերպիչները բազմաթիվ նամակներ են ուղարկել քաղաքապետարան, որպեսզի իրենց աջակցեն և տարածքներ տրամադրեն բացօթյա ֆիլմեր ցուցադրելու և երաժշտական միջոցառումներ իրականացնելու համար, սակայն նամակներն այդպես էլ անպատասխան են մնացել:
«Քաղաքապետարանն այս տարի իրեն շատ տարօրինակ պահեց, մենք սպասում էինք իրենց օգնությանը, որպեսզի մեր փառատոնն ավելի հնչեղ լիներ, որ տեղադրվեին պաստառներ, որոնք ժողովրդին կտեղեկացնեին, թե ինչ փառատոն է անցկացվում Երևանում, հատկապես, որ մուտքն ազատ էր բոլորի համար»,-նեղսրտում է Շահեն Նազարենկոն և հավելում, որ խոսքը բնավ էլ ֆինանսական օգնություն մասին չէ:
«Շատ վիրավորական է, երբ դու անում ես այսքան դժվար և մեծ մասշտաբի փառատոն և քեզ չեն աջակցում»,-ասաց Նազարենկոն շնորհակալություն հայտնելով բոլոր նրանց, ովքեր օգնել են ծագած խնդիրները լուծելու համար:
Sputnik Արմենիան դիմեց Երևանի քաղաքապետարան` մեկնաբանություն ստանալու համար։ Խոստացան ավելի ուշ անդրադառնալ խնդրին։
Չնայած, որ փառատոնի կազմակերպիչները հայտարարում են, թե փառատոնում չհաղթած ֆիլմեր չկան, քանզի յուրաքանչյուր ֆիլմ հոգևոր արժեք է, այնուամենայնիվ, ներկայացրին անվանակարգերում հաղթած ֆիլմերը:
- Լավագույն ուղերձ «Քաջություն» անվանակարգում հաղթող ճանաչվեց «Հալեպ» ֆիլմը ԱՄՆ-ից: Լավագույն ուղերձ «Սեր» անվանակարգում հաղթեց «Մրցանակ» ֆիլմը Մակեդոնիայից:
Նշենք, որ 37 ֆիլմ` ներկայացված 13 երկրից, ընտրվել էին փառատոնին մասնակցելու համար:
Մրցանակ- հուշանվերները պատրաստել են Նոր Խարբերդի մանկատան սաները, իսկ պատվոգրերը հատուկ թղթից էին՝ ապրիլի 24-ին Ծիծեռնակաբերդից հավաքված ծաղիկների թերթերից: