ԵՐԵՎԱՆ, 22 հուլիսի - Sputnik, Արմենուհի Մխոյան. Գյումրու Գորկու փողոցում տեղադրված աղբամաններից մեկում նռնակ է հայտնաբերվել: Այս մասին ահազանգը ՀՀ ԱԻ Շիրակի մարզային փրկարարական վարչությունը ստացել է այսօր՝ օգոստոսի 28-ին, ժամը 13:32-ին:
Դեպքի վայր է մեկնել ԱԻՆ ՓԾ մարզային փրկարարական վարչության հրշեջ-փրկարարական ջոկատից մեկ մարտական հաշվարկ և փրկարարական վարչության օպերատիվ խումբը:
«Ահազանգը ստանալուն պես տարածքն արգելափակվել է, դադարեցվել է մեքենաների շարժը և հրավիրվել մասնագետ՝ Շիրակի մարզի կայազորից: Մասնագետը տեղում պարզել է, որ նռնակն ուսումնական է»,-Sputnik Արմենիային պատմեց ՀՀ ԱԻ Շիրակի մարզային փրկարարական վարչության պետ Ալեքսան Գյոզալյանը:
Նորամարգի տներից մեկում նռնակ է պայթել. ընտանիքի անդամները հիվանդանոցում են
Նշենք, որ նռնակը հայտնաբերել է Գյումրու քաղաքապետարանի կոմունալ ծառայության աղբահավաք մեքենաներից մեկի վարորդը:
Հիշեցնենք՝ նմանատիպ մեկ այլ դեպք էլ այս տարվա հուլիսին էր գրանցվել Գյումրիում: Նռնակն աղբամանում հայտնաբերել էր կոմունալ ծառայության մեկ այլ վարորդ: Չպատկերացնելով, որ նռնակը մարտական է, նա քաշել էր օղակը: Նռնակը պայթել էր 44 ամյա տղամարդու ձեռքի մեջ, և նա կորցրել էր 2 մատը: