ԵՐԵՎԱՆ, 28 օգոստոսի — Sputnik. «Խոսրովի անտառ» պետական արգելոցում Վայրի բնության հիմնադրամի (WWF) տեղադրած ֆոտոթակարդները նկարահանել են կովկասյան ընձառյուծին։ Վայրի կենդանու եզակի լուսանկարները հրապարակվել են արգելոցի Facebook-յան էջում։
«Ընձառյուծը հայտնվել էր արգելոցում 21 հունվարի 2018թ.-ին և մինչ օրս գտնվում է պետական արգելոցի տարածքում»,– հիշեցնում են Խոսրովի անտառից։
Մեկ այլ հրապարակման մեջ «Խոսրովի անտառ» պետական արգելոցը հրապարակել է ֆոտոթակարդի արձանագրած գորշ արջի ու նրա 2 քոթոթների անտառային զբոսանքի մի քանի ակնթարթները։
Մեկ այլ հրապարակում էլ արվել է Վայրի բնության հիմնադրամի (WWF) Facebook-յան էջում։ Տեսանյութը հանրայնացրել է ընձառյուծի խնամակալ Գառնիկ Գևորգյանը` վերնագրելով այն «Զայրացած խոզուկները»։
Տեսանյութում պատկերված է վայրի խոզերի մարտական խաղերից մի հատված։