ԵՐԵՎԱՆ, 27 օգոստոսի — Sputnik. Ես չեմ կարող աշխատել մի հավաքականում, որտեղ թիմի մարզումների ժամանակացույցը, մրցումների մասնակիցների կազմ ընտրելը փորձում են իմ փոխարեն անել մարզիկները։ Այս մասին այսօր Sputnik Արմենիա մուլտիմեդիոն մամուլի ակումբում կայացած մամուլի ասուլիսի ժամանակ ասաց Հունահռոմեական ոճի ըմբշամարտի Հայաստանի հավաքականի գլխավոր մարզիչ Լևոն Ջուլֆալակյանը` մեկնաբանելով իր հրաժարականը:
Քսան տարուց ավելի հավաքականը գլխավորելուց հետո աշխարհի առաջնությունից առաջ Լևոն Ջուլֆալակյանի հրաժարականը զբաղեցրած պաշտոնից անակնկալ էր բոլորի համար: Պարզվում է, որ մեկ ամսվա ընթացքում հավաքականում երբեմնի բարի ու գործնական մթնոլորտը խաթարվել է:
«Հայաստանի հավաքականում իմ աշխատանքի 20 տարիների ընթացքում մեր ըմբիշներն ամենաբարձր կարգի մրցումներում նվաճել են 70 մեդալ: Ես որպես մարզիկ ու որպես մարզիչ հասել եմ բոլոր բարձունքներին, բայց թույլ չեմ տա ոչ մեկին հավաքականում ինձ դարձնել մարզիկների կատարածուն: Հեռանում եմ հպարտ իմ կատարած ախատանքով, որին նվիրված եմ եղել անմնացորդ» - ասաց Լևոն Ջուլֆալակյանը:
Գլխավոր մարզչի ու որոշ ըմբիշների միջև առաջացած տարաձայնություններն ավելի պարզեցնելու համար Ջուլֆալակյանը բացեց բոլոր փակագծերը։ Գաղտնիք չէ, որ բոլոր մարզիկների վարպետությունը բարձրանում է մրցակցության պայմաններում: Կարելի է ասել, որ մրցակցությունն ապահովում է ապագա արդյունքները: Եվ խնդիրը նույն քաշային կարգում հանդես եկող Մաքսիմ Մանուկյան- Արթուր Շահինյան և Արսեն Ջուլֆալակյան-Կարապետ Չալյան զույգերի մեջ է:
Սահակ Հովհաննիսյանն ու Շանթ Խաչատրյանը ըմբշամարտի աշխարհի առաջնության եզրափակչում են
Լևոն Ջուլֆալակյանը, բնականաբար, հաշվի է առել այս մարզիկների միջև կայացած գոտեմարտերի արդյունքները Հայաստանի առաջնություններում, բայց հաշվի է առել նաև, թե ինչպես են վերը նշված մարզիկներից յուրաքանչյուրը հանդես եկել միջազգային մրցաշարերում: Եվ մարզչական որոշումը, որով աշխարհի առաջնությունում պետք է հանդես գար Արսեն Ջուլֆալակյանը, դուր չի եկել մարզիկներին: Սկսել են առաջանալ խմորումներ: Հավաքականի որոշ մարզիկներ հրաժարվել են մասնակցել մարզումներին:
«Ես Հայաստանի օլիմպիական կոմիտեի, նախարարության ու ըմբշամարտի Հայաստանի ֆեդերացիայի հետ խնդիրներ չունեմ և չեմ էլ ունեցել: Հակառակը, այս կազմակերպությունները և նրանց ղեկավարները ինձ փորձել են հետ կանգնեցնել իմ կայացրած որոշումից: Բայց ես չեմ կարող ու չեմ ուզում աշխատել մի հավաքականում, որտեղ մարզիկ-մարզիչ հարաբարերություն չկա»- ավելացրեց Լևոն Ջուլֆալակյանը:
Իր հերթին, չնայած հոր հրաժարականին, Արսեն Ջուլֆալակյանը նշեց. «Ես իմ անձնական մարզիչ Լևոն Ջուլֆալակյանի հետ շարուանակելու եմ մարզվել, որպեսզի կարողանամ վաստակել Տոկիո-2020-ի ուղեգիր: Կլինի դա Հայաստանի հավաքականում, թե առանձին ցույց կտա ժամանակը»:
Առայժմ հայտնի չէ, թե ով կգլխավորի Հայաստանի հունահռոմեական ոճի ըմբշամարտի հավաքականը, որը սեպտեմբերին Ղազախստանում մասնակցելու է աշխարհի առաջնությանը։