ԵՐԵՎԱՆ, 26 օգոստոսի — Sputnik. ՀՀ քննչական կոմիտեում քրեական գործ է հարուցվել` ՀՀ պաշտպանության նախարարության կողմից ռազմամթերքի խոշոր խմբաքանակ ձեռք բերելու նպատակով, «Օրսիս Արմս» ընկերության գնահատող հանձնաժողովի կողմից կեղծ պատճառաբանություններով մրցույթին մասնակցելու հայտը մերժելու վերաբերյալ: Այս մասին Sputnik Արմենիային հայտնեց Քննչական կոմիտեի տեղեկատվության և հասարակայնության հետ կապերի բաժնի պետ Նաիրա Հարությունյանը։
«Հաղորդումը ներկայացրել է ՀՀ-ում գրանցված, ռեզիդենտ հանդիսացող «Օրսիս Արմս» ընկերության ներկայացուցիչ, ՀՀ փաստաբանների պալատի փաստաբան Ալեքսանդր Սիրունյանը»,–ասաց նա։
Նրա խոսքով` ՀՀ քննչական կոմիտեի զինվորական գլխավոր վարչությունում նշված հաղորդման հիման վրա նախապատրաստված նյութերով օգոստոսի 17–ին հարուցվել է քրեական գործ ՀՀ քրեական օրենսգրքի 376-րդ հոդվածի 1-ին մասով նախատեսված հանցագործության հատկանիշներով, այն է` անփույթ վերաբերմունքը ծառայության նկատմամբ:
Քրեական գործով նախաքննությունը շարունակվում է։
Ռազմական անակնկալներ․ ի՞նչ էր ակնարկում Դավիթ Տոնոյանը
Հիշեցնենք, որ ավելի վաղ հայտնել էինք, որ Հայաստանի պաշտպանության նախարարության՝ զենքի մատակարարման վերաբերյալ տենդերի խափանումից հետո, որին մասնակցում էր միայն ռուսական ORSIS ընկերությունը, հարուցվել է քրեական գործ։
2019թ.-ի մայիսին ՀՀ ՊՆ-ն հայտարարել էր տենդեր՝ մի քանի միլիոն դոլար արժողության զենք-զինամթերք մատակարարելու վերաբերյալ։ Ռուսական ORSIS ընկերությունը հայտ էր ներկայացրել, սակայն տենդերը շուտով փակվել էր՝ ընկերության համար անհայտ պատճառով։ Դրանից հետո ռուսական ընկերությունը դիմել է բողոքարկման հանձնաժողովին և Հայաստանում իրենց շահերը ներկայացնող փաստաբանին, որոնց գործողությունների արդյունքում հարուցվել է քրեական գործ։