ԵՐԵՎԱՆ, 26 օգոստոսի — Sputnik. Այսօր վաղ առավոտից Տավուշի մարզի Արճիս համայնքի բնակիչները փակել են Ալավերդի-Բագրատաշեն միջպետական ճանապարհի (M 6)՝ Արճիս գյուղի հատվածը։ Այս մասին Facebook սոցիալական ցանցի իր էջում գրել է օգտատեր Գարիկ Միսկարյանը։
«Այսկերպ գյուղացիները փորձում են լսելի դարձնել գյուղի` խմելու ջրի օրհասական խնդիրը»,–գրել է նա։
Արճիսի բնակիչներից մեկը նշում է, որ իր բնակարանը տրամադրում է ՀՀ վարչապետին, փոխվարչապետին, որ գան ապրեն ու ապացուցեն, որ առանց ջրի հնարավոր է ապրել։
«Եկեք՝ 10 օր մնացեք, կարող է` դուք մեզ ապացուցում եք, որ առանց ջրի հնարավոր է ապրել։ Էն ժամանակ` ես ձեր ցավը տանեմ։ Հարգելի պատգամավոր Սիփան Փաշինյան, Դուք երկու ամիս առաջ ասացիք, որ արտերկրում եք ու երբ վերադառնաք, կայցելեք ու այս հարցը կլուծեք։ Դեռ չեք վերադարձե՞լ, թե՞ պիտի մեզ մոտ գաք միայն ընտրություններից առաջ. չգաք, չենք ընտրելու»,–ասաց արճիսցին։
Տավուշի մարզի Այրում խոշորացված համայնքի (Արճիսը ներառված է այս խոշորացված համայնքի կազմում) ղեկավար Արայիկ Պարանյանը Sputnik Արմենիայի հետ զրույցում նշեց, որ բանակցությունների մեջ է ճանապարհը փակած բնակիչների հետ, որ ճանապարհը բացեն։ «Արդեն կուտակված մեքենաներ կան, ու հիմա ուզում ենք, որ ճանապարհը բացեն, մի քիչ երթևեկությունը թեթևանա։ Մարզպետարանից ասացին, որ կգան, կհանդիպեն գյուղացիների հետ ու դրանից հետո երևի վերջնական կբացեն ճանապարհը»,–ասաց նա։
Նրա խոսքով` համայնքն անտառից եկող աղբյուրներից էր ջուր ստանում, սակայն հիմա այդ աղբյուրները չորացել են, ինչի պատճառով խմելու ջրի խնդիրի առաջ են կանգնել։
Պարանյանը նշեց, որ այժմ Արճիսի բնակիչները ստիպված են լինում հարակից գյուղերից ջուր կրել–բերել։
«Հարցին արագ լուծում տալու միակ տարբերակը պոմպակայան տեղադրելն է, որպեսզի ջուրը մղվի ու հասնի բնակիչներին։ Խնդիրն իր լուծմամբ ներկայացրել ենք կառավարությանը»,–ասաց նա։
«Նիսյայով», բայց ժպիտով. ինչպես են արագածավանցիներն ապրում առանց խմելու ջրի. տեսանյութ
Հիշեցնենք, որ Արճիսի բնակիչները հուլիսի 1–ին նույնպես փակել էին M 6 ավտոճանապարհի՝ Արճիսի հատվածը: