Երևանում երկնաքեր կառուցելու համար շատ լուրջ փորձաքաննություն պետք է անցկացնել։ Sputnik Արմենիային ասել է Քաղաքաշինության պետական կոմիտեի նախագահ Վահագն Վերմիշյանը։
«Թեորիապես չեմ բացառում, բայց կոնկրետ այդ շենքը, այդ տեղում՝ իհա՛րկե ոչ»,–ասում է Վերմիշյանը։
Այս պահին Հայաստանը չունի այդպիսի կազմակերպություն, որին կարելի է դիմել փորձաքննության համար։ Եթե որոշվի հիմա կառուցել, ապա պետք է դրսի կազմակերպություններից խորհրդատվություն ստանալ։
«Եթե համապատասխան տեխնոլոգիաներ ապահովվեն՝ այդ դեպքում խնդիր չեմ տեսնում»,-ասում է Վերմիշյանը։
Ըստ նրա՝ այժմ իր ղեկավարած կառույցը նոր սեյսմիկ նորմեր է մշակում՝ հաշվի առնելով և՛ ճապոնական փորձը, և՛ մեր լավագույն փորձառությունը, և՛ Լոս Անջելեսի Կալիֆոռնիա նահանգի նորմատիվները և այլն։
Վերմիշյանը նշեց, որ առաջնայինը մշակվող ծրագրի մեջ անվտանգությունն է։
«Մենք գտնվում ենք սեյսմիկ գոտում, այստեղ միջոցառումներ են հարկավոր անել, բավականին մեծ ցանկ է»,–նշում է նա։
Վերմիշյանը նշում է, որ շատ լուրջ փորձաքննություն է անցկացվելու։
Հիշեցնենք, որ Երևանում կառուցվելու է երկնաքեր։ Բարձրությունը՝ ըստ նախգծի հեղինակների՝ կլինի 270 մետր, հարկերը կլինեն 71-ը։ Երկնաքերի նախագծային աշխատանքները կտևեն մոտ 2 տարի, իսկ շինարարական աշխատանքները՝ 5։
Հայտնի է նաև վայրը, որտեղ կկառուցվի հայկական առաջին երկնաքերը․ Դալմայի այգիների հարակից տարածք։ Ներդրումներն էլ կկազմեն 270 մլն դոլար։
Նախագծի հեղինակները ՝ «Լաուրա ինվեսթմենթ» ընկերության ներկայացուցիչները հանդիպել էին ՀՀ էկոնոմիկայի նախարար Տիգրան Խաչատրյանին և քննարկել երկնաքերի կառուցման հետ կապված տարբեր հարցեր։
Նախարար Տիգրան Խաչատրյանը վստահեցրել է՝ ներդրողները կզգան նախարարության աջակցությունը բոլոր հարցերում։