ԵՐԵՎԱՆ, 18 օգոստոսի — Sputnik. Լոռու մարզի Պուշկինո գյուղում, իր տանն այրված հայտնաբերված տղամարդը, պարզվում է մահացել է ոչ թե հրդեհի հետևանքով, այլ սպանվել է մինչ տան այրվելը։
Այս մասին հայտնում է shamshyan.com կայքը` նշելով, որ իրավապահներին հաջողվել է տաք հետքերով բացահայտել սպանությունը։
Դատաբժշկի նախնական եզրակացության համաձայն, դիակի վրա հայտնաբերվել են դանակի բազմաթիվ հարվածների հետքեր: Սպանության համար կասկածվում է Լոռու մարզի Գարգառ գյուղի բնակիչ, 20-ամյա Արեն Մ.-ն:
Նախնական վարկածով նա տան տիրոջը սպանելուց հետո հետքերը վերացնելու նպատակով այրել է տունը, իսկ դեպքի վայր ժամանած հրշեջները կրակը մարելուց հետո ներսում հայտնաբերել են տղամարդու արդեն կիսամոխրացած դին:
Արեն Մ.-ն ձերբակալվել է։
Դանակահարություն Ջրվեժում. երկու երիտասարդ հիվանդանոցում են
Հիշեցնենք` Լոռու մարզի Պուշկինո գյուղում օգոստոսի 17-ին, ժամը 23։09-ին տուն էր այրվել: Դեպքի վայր ժամանած փրկարարները հրդեհը մարելուց հետո խոհանոցի հատակին հայտնաբերել էին տանտիրոջ` Ժիրայր Բասմաջյանի այրված դին:
Բասմաջյանն աշխատում էր Լոռու մարզպետարանում: