ԵՐԵՎԱՆ, 17 օգոստոսի — Sputnik, Արմենուհի Մխոյան. Առաջիկա սեպտեմբերին արդեն Գյումրու Վարդան Աճեմյանի անվան պետական դրամատիկական թատրոնն իր անդավաճան հանդիսատեսներին կընդունի թարմ շունչ ստացած դահլիճով ու նոր խաղացանկով: Նորացված ճեմասրահ՝ խունացած ու հնամաշ ուղեգորգերի փոխարեն, նոր թիկնաթոռներ՝ դժգունած աթոռների փոխարեն: Հատկանշական է, որ նորոգումն իրականացվել է թատրոնի սեփական միջոցներով միայն, ըստ որում՝ խաղաշրջանների արձակուրդային միջակայքում:
Փոփոխություններից դահլիճում աթոռների քանակը մի փոքր նվազել է, բայց դա անհրաժեշտություն էր: Բանն այն է, որ հանդիսատեսի անվտանգության նկատառումներից ելնելով, դահլիճում աթոռաշարքերի դասավորությունը փոխվել է: Եթե նախկինում 20 աթոռաշարք էր՝ 33 տեղով, ապա հիմա 1-7-րդ կարգը պարտերն է, որից հետո՝ ամֆիթատրոնը:
«Եթե նախկինում թատրոնն ուներ 648 տեղ, հիմա ունենալու է 615-ը, սակայն դա չի նշանակում, որ դրանից թատրոնը տուժելու է: Հակառակը` այսպես դահլիճն ավելի հարմարավետ է, ինչպես տեսողական, այնպես էլ՝ հանդիսատեսի շարժը կանոնակարգելու առումով, նաև՝ ապահովության տեսանկյունից: Աշխատանքներն ամբողջությամբ կատարվել են թատրոնի սեփական միջոցներով՝ ոչ մի լրացուցիչ գումար չի ներգրավվել: Ընդհանուր ծախսը կազմել է 5 մլն դրամից ավելի»,- Sputnik Արմենիայի հետ զրույցում ասել է թատրոնի մենեջեր Նվարդ Ղազարյանը:
Մինչ 154 թատերաշրջանի բացումը, որ նախատեսված է Անկախության վերականգնման տոնի նախօրեին՝ սեպտեմբերի 20-ին, թատրոնում վերջին շտկումներն են իրականացվում:
Հասկանալի է, իհարկե, որ միայն շենքային կամ դահլիճային տեսքը չէ թարմացվել. նոր թատերաշրջանին ընդառաջ, ինչպես նշում են աճեմյանցիները, ստեղծագործական գործընթացը ևս վերելքի մեջ է: Մասնավորապես, հանդիսատեսի դատին կներկայացվեն Նիկոլայ Ծատուրյանի «Թռիչքը» այլաբանությունը, հրավիրված դերասաններ Անի Խաչիկյանի և Սամվել Գրիգորյանի, Արսեն Միքայելյանի, Տիգրան Գաբոյանի մասնակցությամբ:
«Թատերաշրջանի բացման օրը անակնկալ է սպասվում հանդիսատեսին ոչ միայն թատրոնում, այլ թատրոնից դուրս՝ «Թատերական» հրապարակում, սակայն դրա մասին չենք խոսի»,-նշեց Նվարդ Ղազարյանը:
Այս թատերաշրջանում կներկայացվի նաև Գաբրիել Գարսիա Մարկեսի «Երկնագույն շան աչքերը» պիեսը՝ նոր դերակատարներով ու նոր խորեոգրաֆիկ լուծումներով, հանդես կգա հրավիրված դերասանուհի Իննա Խոջամիրյանը: «Ի դեպ, դերասանուհին առաջին անգամ թատրոնի բեմ կբարձրանա իր ծննդյան օրը՝ սեպտեմբերի 25-ին»:
Հոկտեմբերին մանկահասակ հանդիսատեսների համար նոր ներկայացում կլինի՝ «Բուրատինոյի արկածները»: Արդեն մեկ տարի է, ինչ թատրոնը համագործակցում է Լիբանանի Համազգայինի «Գասպար Իփեկյան» թատերախմբի հետ: Այս տարի թատրոնի տնօրեն Լյուդվիգ Հարությունյանի հրավերով Գյումրու դրամատիկականում «Գասպար Իփեկյան» թատերախմբի ռեժիսոր Հակոբ Տեր-Ղուկասյանը նախատեսում է բեմադրել Արա Արծրունու «Բարի լույս, պարոն Մաթեոս» պիեսը: Հետաքրքրական է, որ բեմադրությունը ծրագրվում է ինչպես արևմտահայերն, այնպես էլ՝ արևելահայերն: Այս պիեսի առաջնախաղը տեղի կունենա հոկտեմբերին:
Խաղացանկ կվերադարձվեն նաև «Սիրո քասթինգ», «Փարիզը վտանգավոր քաղաք է» և մանկական «Երեք խոզուկները» ներկայացումները: Մանուկների համար կբեմադրվեն նաև «Փանոսի արկածները»:
Հավելենք, որ անցած թատերաշրջանում միայն ամանորյա ներկայացումների ժամանակ թատրոնը գերազանցեց 15 հազար հանդիսատեսի ցուցանիշը: Տրամաբանական է, որ այս տարի ակնկալում են ավելի աշխույժ հետաքրքրություն, ավելի շատ հանդիսատես: Գյումրու դրամատիկականը դեռ անցած թատերաշրջանին էր բարձր նշաձող վերցրել, իսկ այս տարի կփորձի գերազանցել այն: