ԵՐԵՎԱՆ, 15 օգոստոսի — Sputnik. ՌԴ-ում ՀՀ դեսպան Վարդան Տողանյանի` Պյատիգորսկի ճամբարում եղած ժամանակ որևէ միջադեպ չի եղել, ինչի մասին խոսում է Ադրբեջանի ԱԳՆ–ն։ Այս մասին Sputnik Արմենիայի հետ զրույցում ասաց ՀՀ ԱԳ նախարարի խոսնակ Աննա Նաղդալյանը։
Նշենք, որ Ռուսաստանում Ադրբեջանի դեսպանատունը ՌԴ ԱԳՆ–ին նամակով դիմել էր, թե Տողանյանն «Ադրբեջանի տարածքային ամբողջականության վերաբերյալ անթույլատրելի արտահայտություններ է կատարել», ինչը հարուցել է համաժողովին մասնակցող «Բաքվի երիտասարդության ակումբ» հասարակական միավորման նախագահ Սաբիր Ռուստամովի բողոքը, և տեղի է ունեցել տհաճ միջադեպ:
«Օգոստոսի 11-ին Վարդան Տողանյանը 10-րդ երիտասարդական ֆորումի շրջանակներում ֆորումի մոտ 500 մասնակիցների համար հանդես է եկել դասախոսությամբ՝ նվիրված Հայաստանի և Ռուսաստանի պատմամշակութային կապերին: Դասախոսության ավարտին ՀՀ դեսպանը պատասխանել է մոտ երեք տասնյակ մասնակիցների, այդ թվում՝ ադրբեջանցի մասնակցի հարցերին»,–ասաց Նաղդալյանը։
Նա հայտնեց նաև, որ ԼՂ հիմնախնդրի առնչությամբ դեսպան Տողանյանը ներկայացրել է խնդրի կարգավորման գործընթացում Հայաստանի մոտեցումները և սկզբունքային դիրքորոշումը:
Ադրբեջանի պահվածքը բանակցային գործընթացը խաթարելու փորձ է. ՀՀ ԱԳՆ-ի արձագանքը
Հիշեցնենք, որ օգոստոսի 9-ին Պյատիգորսկ քաղաքում մեկնարկել է «Մաշուկ 2019» հյուսիսկովկասյան երիտասարդական համաժողովը, որի ընթացքում ելույթ էր ունեցել նաև ՌԴ-ում ՀՀ դեսպան Վարդան Տողանյանը: