ԵՐԵՎԱՆ, 9 օգոստոսի — Sputnik. Դժվար է ասել՝ որքանով է իրականությանը համապատասխանում 2008 թվականի մարտի 1-2-ի իրադարձությունների մասին՝ BBC-ի վերջին հրապարակումը։
Այս մասին լրագրողներին ասաց ՀՀ փոխվարչապետ Տիգրան Ավինյանը` մեկնաբանելով հրապարակված տեղեկությունները, որոնց համաձայն Սամվել Կարապետյանը աջակցել է Երևանում ցույցերի զինված ճնշմանը։
«Այդ հրապարակման մեջ սկզբնաղբյուրները ներկայացված չեն։ Այդ պատճառով էլ ներկա փուլում դժվար է մեկնաբանել, թե որքանով է այդ հրապարակումը համապատասխանում իրականությանը»,- հայտարարեց փոխվարչապետը։
Օրերս BBC–ի ռուսական լրատվական գործակալությունը համացանցում հոդված էր հրապարակել, որում նշվում էր, որ հրատարակչության ձեռքի տակ է հայտնվել Արցախի հերոս, գեներալ–մայոր Սամվել Կարապետյանի (Օգանովսկի) հարցաքննության արձանագրությունը։ BBC–ի լրագրողը պնդում էր, որ, քննության վարկածով, Կարապետյանն իր ենթակայության տակ գտնվող անձանցից 20 հոգանոց խումբ է ձևավորել, որը 2008 թվականի մարտի 1-ի դեպքերի ժամանակ տեղակայվել է Մարշալ Բաղրամյան պողատայում գտնվող նախագահական նստավայրի նկուղում։ Քննության վարկածով` մարտի 1-ին ցուցարարների ուղղությամբ այդ խումբն է կրակել։ Կարապետյանն իր հասցեին հնչած բոլոր մեղադրանքներն արդեն հերքել է։
Հիշեցնենք` 2008թ.–ի մարտի 1-ի լույս 2-ի գիշերը Երևանի կենտրոնում զանգվածային բողոքի գործողություններ, անկարգություններ, ոստիկանության հետ բախումներ տեղի ունեցան, որոնց հետևանքով զոհվեց 10 մարդ (2 ոստիկան, 8 քաղաքացիական անձ), վիրավորվեցին հարյուրավոր մարդիկ։ Հայաստանում հայտարարվեց արտակարգ դրություն 1 ամիս ժամկետով:
Այդ իրադարձություններին նախորդել էին փետրվարի 19-ին տեղի ունեցած նախագահական ընտրությունները, որոնց պաշտոնական արդյունքներից դժգոհ ՀՀ առաջին նախագահ, նախագահի թեկնածու Լևոն Տեր-Պետրոսյանի կողմնակիցները Ազատության հրապարակում շուրջօրյա բողոքի ակցիաներ սկսեցին։
Մարտի 1-ի զոհերի իրավահաջորդները 30 միլիոն դրամ փոխհատուցում կստանան
Լևոն Տեր-Պետրոսյանն ու նրա կողմնակիցները չէին ընդունում ընտրությունների արդյունքները և պնդում էին, որ նախագահ է ընտրվել Տեր-Պետրոսյանը:
Չեմ բացառում, որ BBC-ի հրապարակումը հատուկ պատվեր լինի. Սամվել Կարապետյան (Օգանովսկի)