ԵՐԵՎԱՆ, 9 օգոստոսի — Sputnik, Արմենուհի Մխոյան. Հիվանդանոցի պատմության մեջ առաջին անգամ է, որ մեկ օրում՝ օգոստոսի 8-ին, 9 ծնունդ է գրանցվել՝ 3 տղա և 6 աղջիկ: Ինչպես Sputnik Արմենիային տեղեկացրեց հիվանդանոցի տնօրեն Աշոտ Կուրղինյանը, երեխաներն առողջ են, մայրերը` երջանիկ:
«Մինչ այս մեկ օրում 7 ծնունդ ունեցել էինք, բայց 9-ը առաջին անգամ է: Նրանք կամ առաջնեկ են, կամ երկրորդ զավակ: Ընդհանուր առմամբ, եթե խոսքը մեր հիվանդանոցի մասին է, ապա ծնունդների դինամիկ աճ ունենք»,-նշեց Աշոտ Կուրղինյանը:
Հավելենք, որ օրվա «հերոսները» տոնը նշանավորեցին հիվանդանոցում օրորոցով առաջին զբոսանքով:
«Գյումրու Մոր և Մանկան Ավստրիական Հիվանդանոց» ՓԲԸ-ն (նախկին Ավստրիական Մանկական Հիվանդանոց) հիմնադրվել է 1991թ. դեկտեմբերին: Հիվանդանոցի կառուցումը Ավստրիայի հանրապետության նվերն է Սպիտակի երկրաշարժից տուժած հայ ժողովրդին։ Հիվանդանոցը սկսեց գործել 1992թ-ից և մինչև այժմ այն համարվում է հանրապետությունում խոշոր, իսկ Շիրակի մարզում միակ մանկական բազմապրոֆիլ հիվանդանոցը: