ԵՐԵՎԱՆ, 6 օգոստոսի – Sputnik. Օգոստոսի 8-ին Երևանի բնակիչներն ու հյուրերն իսկական սթրիթ արտ կտեսնեն կենտրոնական փողոցներից մեկում` Կասկադի հարևանությամբ գտնվող Իսահակյան փողոցում։ Խաղադաշտը նախատեսված է լինելու ինչպես սթրիթբոլի՝ բակային բասկետբոլի, այնպես էլ բակային ֆուտբոլի համար:
Նախաձեռնության հեղինակ, Jet Set ընկերության արտ տնօրեն Պետրոս Ծամերյանը հայտնեց, որ Street art–ը (փողոցային արվեստ) հետզհետե ավելի մեծ ժողովրդականություն է վայելում։ Սթրիթ արտի առանձնահատկությունը գրաֆիտիներն են, և այդ ուղղության հետևորդները տարբեր սյուժեներ ու գրություններ են պատկերում շենքերի, հարթակների պատերին։ Անմասն չի մնացել նաև Հայաստանը։
Սթրիթբոլը տարածված է Արևմուտքում, սովորական բասկետբոլից տարբերվում է խաղացողների քանակով (խաղում են երեքով), խաղադաշտ է ծառայում բասկետբոլի դաշտի միայն կեսը։ Այժմ սթրիթբոլի հարթակ կլինի նաև Երևանում, ինչպես Նյու Յորքի Բրուքլինում։
Երևանում սթրիթբոլի` 400 քմ մակերեսով դաշտը պատկերազարդելու ցանկություն է հայտնել նկարիչ Դմիտրի Պոտապովը։ Sputnik Արմենիայի հետ զրույցում նա պատմեց, որ Պետրոս Ծամերյանի հետ ծանոթանալու պահին Հայաստանում է եղել և Գյումրիում ու Երևանում դասավանդում էր երիտասարդ նկարիչներին։ Նրա խոսքով` սա իր առաջին խաղահրապարակն է, մինչ այդ նա պատեր է նկարազարդել, այդ թվում` Հայաստանի տարածքում։
Դմիտրի Պոտապովին օգնում է Էդվարդ Հովսեփյանը, որը Մոսկվայից Հայաստան է եկել արձակուրդն անցկացնելու։ Երիտասարդները ծանոթացել են սոցցանցում։ Նա սթրիթ արտով է զբաղվում պրոֆեսիոնալ մակարդակով, այդ պատճառով էլ նախագծի մասին իմանալով` անմիջապես կապ է հաստատել Դիմայի հետ։
«Երևանը ոչնչով չի զիջում մյուս քաղաքներին, հետխորհրդային մի շարք հանրապետություններում այսօր այդ մարզաձևը բավական զարգացած է, և մարդիկ շատ հանգիստ են դրան արձագանքում։ Նման արդյունքների պետք է հասնել նաև Հայաստանում»,– ասաց նա։
Հարթակի բացման արարողության շրջանակում օգոստոսի 8-ին կանցկացվի սթրիթբոլի առաջին խաղը։
Հյուրերի նախասիրությունները փոխվել են, իսկ Հայաստանի զբոսաշրջային ոլորտում կադրային աղետ է