ԵՐԵՎԱՆ, 6 օգոստոսի – Sputnik. Արցախի մայրաքաղաք Ստեփանակերտի Ստեփան Շահումյանի անվան «Հանրապետական» մարզադաշտում տեղի ունեցած Համահայկական ամառային 7-րդ խաղերի բացման հանդիսավոր արարողության ընթացքում ՀՀ վարչապետ Նիկոլ Փաշինյանը խաղերը հայտարարեց բացված։
«Այսօր մեր հայրենիքում տոն է, որովհետև մեր ժողովրդի հազարավոր զավակներ Եվրոպայից, Ասիայից, Ավստրալիայից, Հյուսիսային և Հարավային Ամերիկաներից մեկտեղել են հայության արժանապատվությունը միջնաբերդ Արցախում, և մենք վայելում ենք միասին լինելու երջանկությունը։ Իսկ ինչո՞ւ է մեզ այսպիսի երջանկություն պարգևում միասին լինելը, որովհետև մեր երակներով հոսում է նույն արյունը։ Մենք հավաքվել ենք Արցախում վայելելու և զգալու մեր միասնության ուժը, հասկանալու, որ մենք անպարտելի ենք, երբ միասնական ենք»,– ասաց նա։
Փաշինյանի խոսքով` հայերը հավաքվել են արձանագրելու, որ ունեն պատմություն, ունեն ինքնություն, ունեն պետականություն և ունեն կամք՝ ժողովրդի հազարամյա հաղթական երթը նոր հազարամյակներով շարունակելու։
«Այսօր մենք հավաքելու ենք հզոր և անկոտրում մեր կամքը, մեր հաղթանակի կամքը, մեր ապրելու ստեղծագործելու, մեր պետականությունը զարգացնելու կամքը բարձրաձայնելու։ Այսօր Համահայկական 7-րդ խաղերի հազարավոր ներկայացուցիչներ դաստիարակելու հզորացնելու և զարգացնելու են մեր ժողովրդի հաղթելու կամքը և հմտությունը։ Եվ ուրեմն Համահայկական խաղերի բոլոր մասնակիցներին մաղթում եմ հաղթանակ՝ արդար մրցակցության մեջ։ Եվ ուրեմն Համահայկական 7-րդ խաղերը հայտարարում եմ բացված»,– ասաց նա։
«Ռիսկի դիմել չեն կամենում». ստամբուլահայերը Համահայկական խաղերին չեն մասնակցի
Համահայկական խաղերի առաջին 3 օրը մրցումները կանցկացվեն Արցախի մայրաքաղաք Ստեփանակերտում, օգոստոսի 9-17-ը՝ Երևանում: Փակումը տեղի կունենա օգոստոսի 17-ին` Երևանի Ազատության հրապարակում:
Համահայկական խաղերն այս տարի ընդգրկում են 17 մարզաձև։
Համահայկական խաղերին մի քանի երկիր մասնակիցների աննախադեպ մեծ թվով են ներկայանալու