ԵՐԵՎԱՆ, 2 օգոստոսի — Sputnik. Ջրային կոմիտեն հայտարարեց` արագիլներին աղտոտող թափոնները Արարատի մարզի ձկնաբուծարանների «ձեռքի գործն են»։
Կոմիտեի տարածած հաղորդագրության մեջ նշվում է, որ այսօր մաքրված Հրազդան գետի տարածքում` Սիս համայնքից եկող բաց դրենաժային ցանցում, Սիս-Նորամարգ- Ռանչպար համայնքների խաչմերուկում, կամրջի տակ, աղբի իսկական պահեստ է հայտնաբերվել։
«Աղբի կուտակմանը նպաստում է նաև «Նաիրիտ» գործարանից եկող և դրենաժին հատվող խոշոր տրամաչափի չգործող խողովակը։ Իսկ կուտակված աղբի մեջ գերակշիռը ձկնաբուծարաններից եկող ճարպոտ թափոններն են, որոնք էլ, ի դեպ, վերջին օրերին պատուհաս են դարձել տարածքի արագիլների համար»,– ասված է կոմիտեի տարածած հաղորդագրության մեջ։
Ջրային կոմիտեն հայտնում է, որ Հրազդանի տվյալ հատվածից այսօր հեռացվել է 30 տոննայից ավելի աղբ, սակայն հարկ կլինի եռակի ավելին էլ հանել։
«Տեղանքի բարդությունից ելնելով` ընկերությունը հաջորդ օրերին ավելի բարդ տեխնիկա գործի կդնի՝ կամրջի տակի հատվածը մաքրելու համար, իսկ աղբի հոսքը չի դադարում»,– հայտնում են կոմիտեից։
Արարատի մարզում արագիլներն աղետալի վիճակում են. մեղավորներին փնտրում են
Հիշեցնենք՝ շուրջ 2 շաբաթ առաջ սոցիալական կայքերում տեղեկություններ տարածվեցին, որ Արարատի մազի Հովտաշեն համայնքի տարածում ապրող արագիլներն աղտոտված են ու չեն կարողանում թռչել։
Որոշ ենթադրությունների համաձայն` արագիլներն աղտոտվել են Հրազդան գետը լցված արտադրական թափոններից։ Բայց հարցի վերջնական պատասխանը կտա գետի ջրից ու կենդանիների փետուրներից վերցված նմուշների լաբորատոր փորձաքննությունը։
Աղտոտված արագիլները սովի են մատնված. նրանք չեն կարողանում թռչել ու իրենց վրա ցեխ են քսում
Օգոստոսի 2-ին Բնապահպանության և ընդերքի տեսչական մարմինը հայտնեց, որ Հրազդան գետի աղտոտված հատվածը կարող է լինել Արարատի մարզի արագիլների աղտոտման հավանական աղբյուրը։