Վտանգավոր թափոնները Հայաստանից դուրս բերելու միակ ճանապարհը Վրաստանն է, մինչդեռ այդ երկրի օրենսդրությունը թույլ չի տալիս իր տարածքով թափոնների արտահանումը։ Այդ մասին Sputnik Արմենիայի հետ զրույցում ասաց Բնապահպանության նախկին նախարար, «Հանուն կայուն մարդկային զարգացման» ասոցիացիայի նախագահ Կարինե Դանիելյանը։
«Հայաստանից վտանգավոր թափոններ տեղափոխելու տարբերակն սկզբունքորեն դժվարանում է, քանի որ Հայաստանի իշխանությունները որոշել են միանալ Եվրասիական տնտեսական միության մաքսային տարածքով վտանգավոր թափոնների անդրսահմանային տեղափոխման մասին ԵԱՏՄ-ի համաձայնագրին, որն անդամ պետություններում չի թույլատրում թափոնների անդրսահմանային տեղափոխումը դրանց թաղման և (կամ) վնասազերծման նպատակով»,-ընդգծեց Դանիելյանը։
Դանիելյանը կարծում է, որ Հայաստանից վտանգավոր թափոնների դուրս բերումը լրջագույն խնդիր է, որը մշտապես քննարկվել է։ Այժմ էլ քննարկվում է այդ թափոնների խնդիրը տեղում լուծելու հարցը։
Նախկին նախարարը վտանգավոր թափոնների վերացման երկու առաջարկ ունի.
«Դրանք պետք է կամ այրվեն, ինչը վիճահարույց է, կամ վերամշակվեն», - նշեց Դանիելյանը։
Նրա խոսքով`ՄԱԿ-ում դեռևս չեն քննարկվել թափոններն այրելու մեխանիզմներ մշակելու հարցը, ինչն էլ այս տարբերակը դարձնում է խնդրահարույց։ Մնում է` վտանգավոր թափոները տեղում այրելու տարբերակը։ Ըստ Դանիելյանի` դրանք բարձր ջերմաստիճանում այրելու դեպքում վտանգավոր արտանետումները հնարավորինս քիչ կլինեն։