2019 թվականին նախորդ տարվա հուլիսի 1-ի համեմատ ակտիվ հարկ վճարող տնտեսվարողների թվի աճը սպասելի էր։ Այս մասին Sputnik Արմենիայի հետ զրույցում ասաց տնտեսագետ Վահագն Խաչատրյանը։
Խաչատրյանի խոսքով` դա պայմանավորված է նրանով, որ գործադիրը տնտեսվարողներին մոտենում է որպես գործընկերոջ։
«Կա նաև մեկ այլ հանգամանք, որ հարկային քաղաքականությունը հնարավորություն է ընձեռում փոքր բիզնեսին դուրս գալ ստվերից, ձևակերպել իրենց գործունեությունը»,-նշեց Խաչատրյանը։
Ըստ տնտեսագետի` իշխանության վարած քաղաքականությունը բարենպաստ պայմաններ է ստեղծում ստվերի կրճատման, հարկերից խուսափողների թվի նվազման և տնտեսական գործունեությունը օրինական դաշտ բերելու համար։
«Հայաստանում ակտիվ տնտեսվարողների թվի աճը խոսում է կառավարության նախաձեռնած բարեփոխումների արդյունավետության մասին»,-ասաց Խաչատրյանը։
Այդուհանդերձ, ըստ նրա, պետք է պարզել` ինչ տնտեսվարողներ են դրանք` խոշո՞ր ընկերություններ են, որոնք նախկինում ստվերում էին գործում, թե՞ նոր խաղացողներ են հայտնվել շուկայում։
Նշենք, որ ըստ պաշտոնական վիճակագրության՝ 2019 թվականի հուլիսի 1-ի դրությամբ ակտիվ հարկ վճարող տնտեսվարողների թիվը նախորդ տարվա նույն ժամանակահատվածի համեմատ աճել է 24500-ով: