ԵՐԵՎԱՆ, 30 հուլիսի — Sputnik, Աշոտ Սաֆարյան. Հայաստանում ակտիվ տնտեսվարողների թվի աճը խոսում է կառավարության նախաձեռնած բարեփոխումների արդյունավետության մասին։ Sputnik Արմենիայի թղթակցի հետ զրուցում նման կարծիք հայտնեց տնտեսագետ Վահագն Խաչատրյանը։
Ավելի վաղ հայտնի էր դարձել, որ ընթացիկ տարվա հուլիսի 1–ի դրությամբ ակտիվորեն հարկ վճարող տնտեսվարողների թիվն անցած տարվա նույն ժամանակահատվածի համեմատ աճել է 24 հազարով ու կազմել է 96 հազար։ Այս մասին Facebook–ի իր էջում հայտնել էր Նիկոլ Փաշինյանը։
Խաչատրյանը նշեց, որ այդ վիճակագրությունն ակնկալելի էր։ Փաստացի, կառավարությունը ստեղծում է մի միջավայր, որի դեպքում բիզնեսը շահագրգռված է ստվերից դուրս գալ ու թափանցիկ գործունեություն ծավալել։ Նա կարծում է, որ տարիներ շարունակ գործարարները վերածվել էին մարդկանց, որոնք ձգտում էին խաբել մարդկանց ու պետությանը։
«Այդ արատավոր մտածելակերպը հետզհետե հեռանում է։ Պետությունը սկսում է գործարարներին վերեբերվել որպես գործընկերների։ Հարկատուների թվի ավելացմանը նպաստում է նաև նոր հարկային քաղաքականությունը։ Տարեկան շրջանառությունը 24 միլիոն դրամը չգերազանցող ընկերություններին հարկերից ազատումը թույլ է տալիս այդ ընկերություններին դուրս գալ ստվերից», – ասում է տնտեսագետը։
Ճիշտ է, պետք է պարզել` ինչ տնտեսվարողներ են դրանք` խոշոր ընկերություններ են, որոնք նախկինում ստվերում էին գործում, թե նոր խաղացողներ են շուկայում։ Ամեն դեպքում, փորձագետի գնահատմամբ, իշխանության քաղաքականությունը ստվերային տնտեսության դեմ պայքարելու համար բարենպաստ պայմաններ է ստեղծում։
Ֆինանսավարկային և բյուջետային հարցերի մշտական հանձնաժողովի նախագահի տեղակալ Արտակ Մանուկյանի կարծիքով` կան մի քանի գործոններ, որոնք կարող են նպաստաել հարկատու ընկերությունների քանակի աճին։ Գործոններից մեկը ԱՁ–ների թվի աճն է։ Առաջին կիսամյակի ընթացքում նախորդ տարվա համեմատ դրանք մոտ 14 հազարով աճել են։
«Հայաստանում նաև ակտիվություն է նկատվում բիզնեսի առումով։ Խաղի նոր կանոններով շատերը շտապում են գրանցել իրենց բիզնեսը։ Ընդհանուր առմամբ գործոնները շատ են։ Բայց միտումը միանշանակ դրական է», – ասաց Մանուկյանը։
Ինչպես կփոխվի հարկատուների կյանքը Հայաստանում, կամ ինչի համար ենք վճարելու 2018 թվականից
Այս պահին Մանուկյանը դժվարանում է գնահատել, թե ինչի հաշվին է ավելացել հարկատու ընկերությունների թիվը` խոշոր տնտեսվարողների ի հայտ գալով, թե նոր ձեռնարկությունների ձևավորմամբ։ Նա նշում է, որ նույնիսկ հաշվի առնելով հազարավոր «կեղծ» ԱՁ–ների (որոնք բացել էր Alex Holding–ը) վերացումը (որոնք հայտնաբերել էին իրավապահ մարմինները) նախորդ տարվա մայիսին, ԱՁ–ների աճի միտումը պահպանվել է։ Մանուկյանը կարծում է, որ մենք գործ ունենք բիզնես բարելավման հետ։