ԵՐԵՎԱՆ, 24 հուլիսի — Sputnik. Հայաստանից Ռուսաստան ներկրվող ելակի մեջ վիտամինների քանակը չի համապատասխանում նորմային։ Նման եզրակացության են հանգել «Ռոսպոտրեբնադզորի» փորձագետները, որոնք «Ռոսիա սեգոդնյա» ՄԳՏ–ի հետ ուսումնասիրություններ են անցկացնում։
Վիտամինների ցածր մակարդակ է գրանցվել նաև ուզբեկական կեռասում ու ծիրանում։
«Ուսումնասիրված կեռասի, ծիրանի ու ելակի բոլոր նմուշներում երկաթի, վիտամին C-ի, նատրիումի ու կալցիումի քանակը սովորականին չի համապատասխանում», – նշվում է Ռոսպոտրեբնադզորի հաղորդագրության մեջ։
Օրինակ` կեռասում երկաթի պարունակությունը վեց անգամ ցածր է նորմայից. ծիրանում` երկու անգամ, ելակում` չորս։ Մամուլի ծառայությունում պարզաբանել են, որ նման շեղումների պատճառ են դառնում կլիմայական պայմանների փոփոխությունը, նաև հողում հանքային նյութերի բացակայությունը։
Նշենք նաև, որ ստուգման ընթացքում Ռոսպոտրեբնադզորի մասնագետները նմուշներում ծանր մետաղի աղեր չեն հայտնաբերել, մրգերը համապատասխանում են անվտանգության նորմերին։