ԵՐԵՎԱՆ, 23 հուլիսի — Sputnik. Քրեակատարողական ծառայությունում «կադրային ջարդ» ու «հներից ազատվելու» միտում չկա, իսկ այդ մասին լուրերը մտացածին են և իրականությանը չեն համապատասխանում։ Այս մասին հայտարարություն է տարածել քրեակատարողական ծառայությունը։
Ինչպես արդեն հայտնել էինք, մամուլում լուրեր էին տարածվել, որ ՔԿ ծառայության պետ Արթուր Գոյունյանն ազատվում է նախկինի կադրերից։
«Քրեակատարողական ծառայությունում, ինչպես և ցանկացած այլ մարմնում, աշխատանքներն առավել արդյունավետ կազմակերպելու նպատակով նախկինում ևս իրականացվել են զբաղեցրած պաշտոններից ազատումներ, նոր նշանակումներ, ինչպես նաև՝ փոխատեղումներ»,–հայտնում են քրեակատարողական ծառայությունից։
Միաժամանակ տեղեկացնում են նաև, որ ներկայումս քրեակատարողական ծառայությունում իրականացվող իրավակազմակերպական բարեփոխումների համատեքստում ապահովվելու է համակարգի կադրային համապատասխանեցումը կառավարության ոլորտային քաղաքականության հիմնական ուղղություններով ներկայացվող պահանջներին։
Չես բռնվել` գող ես, բռնվել ես` էլի գող ես. հայ «օրենքով գողերի» շուրջ վերջին զարգացումները
Այդ շրջանակներում, բնականաբար, կատարվելու են կադրային տեղաշարժի գործընթացներ, ինչը ցանկացած պետական մարմնի գործունեության բնականոն վիճակ է։ Սա, ըստ քրեակատարողական ծառայության, միտված է լինելու համակարգը համալրել բացառապես պահանջվող մասնագիտական գիտելիքներն ու ծառայողական և աշխատանքային ունակությունները բավարարող անձանցով, ինչպես նաև կոռուպցիոն ռիսկերից ու դրսևորումներից զերծ կադրերով։