ԵՐԵՎԱՆ, 18 հուլիսի - Sputnik. Ապօրինի ծառահատումների հետ կապված միայն մեկ քրեական գործի շրջանակներում մեղադրանք է առաջադրվել 21 անձի, այդ թվում` պաշտոնատար անձանց։
Ինչպես արդեն հայտնել էինք, երեկ փայտի գործով զբաղվողները փակել էին Մ4 միջպետական ճանապարհը` բողոքելով փայտի գնից։ Երեկոյան տեղի էին ունեցել բախումներ` ոստիկանների և ցուցարարների միջև, որի հետևանքով 13 անձ էր տեղափոխվել Իջևանի ԲԿ։
«Մեր կողմից հարուցված միայն մեկ քրեական գործի շրջանակներում մեղադրանք է առաջադրվել 21 անձի, այդ թվում` պաշտոնատար անձանց։ Այդ գործը մեղադրական եզրակացություններով՝ ուղարկվել է դատարան»,-ասաց ԱԱԾ տնօրենը։
Նրա խոսքով` ԱԱԾ–ն վերջին շրջանում ոչ միայն Տավուշի մարզում, այլ բոլոր խիտ անտառապատ մարզերում օպերատիվ հետախուզական միջոցառումներ է իրականացրել։ Վանեցյանը նշեց, որ միայն ԱԱԾ-ի կողմից ապօրինի ծառահատումների մասով ավելի քան 10 քրգործ է հարուցվել, որոնցում ներգրավված են մի շարք պաշտոնատար անձինք` թե՛ անտառտնտեսության, թե՛ իրավապահ համակարգի աշխատակիցներ։
«Բոլոր քրեական գործերով Քննչական կոմիտեում քննություն է իրականացվում»,–ասաց Վանեցյանը։
Հիշեցնենք, որ այսօր Տավուշի մարզպետարանում խորհրդակցություն էր հրավիրվել, որի ժամանակ որոշում էր կայացվել, որ պետությունը կկարգավորի փայտի հավաքման պրոցեսը, և գյուղացիները կարող են համայնքի ղեկավարների կամ մարզպետարանների միջոցով վառելափայտ ձեռք բերել։
Ի՞նչ է տեղի ունեցել Իջևանում. բողոքի ակցիայի մանրամասները. տեսանյութ