ԵՐԵՎԱՆ, 17 հուլիսի — Sputnik. Գեղարքունիքի մարզի գրեթե բոլոր բնակավայրերի կոյուղաջրերը հոսում են Սևանա լիճ։ Այսօր Ազգային ժողովում «Սևանա լճի հիմնախնդիրները և դրանց լուծման ուղիները» թեմայով աշխատանքային քննարկման ժամանակ այս մասին հայտարարեց ՀՀ ԳԱԱ Սևանի հարցերով հանձնաժողովի նախագահ Յուրի Ջավադյանը։
«Գավառ քաղաքը կոյուղացված է 47 տոկոսով, Մարտունին` 45, Վարդենիսը` միայն 20 տոկոսով»,– ասաց գիտնականը։
Նա նաև նշեց, որ Սևանի ավազանում գործող մաքրման 3 կայաններն իրականում ավելի շատ կեղտոտում են միջավայրը, քան մաքրում։ Նրա խոսքով` կատարվող մեխանիկական մաքրման արդյունքում ջրից առանձնացվող աղբը պետք է տեղափոխվի աղբավայր, իսկ մարզում կենտրոնացված աղբավայրեր չկան։
«Արդյունքում այն 340 տոննան, որ տանում, լցնում ենք ինչ–որ տեղ, էլի նորից գարնանը հետ է գալիս, գետերի ջրերով նորից հոսում, լցվում է Սևանը»,– ասաց Ջավադյանը։
Սևանի խնդիրը երկսայր սուր է. կկարողանա՞ իշխանությունը գտնել ոսկե միջին լուծումը
Մեկ այլ խնդիր, որ առանձնացրեց գիտնականը, Սևանի ափերի մաքրման թերի կատարված աշխատանքներն են։ Նրա խոսքով` ափամերձ 700 հա տարածքներում ծառերը կտրել են, բայց կոճղերը թողել են, ինչի հետևանքով այսօր այդ 700 հա տարածքում ակտիվ փտման գործընթաց է սկսվել։
Ջավադյանը հիշեցրեց նաև «Լավանդա սիթի» հանգստյան գոտում ջրածածկ 300 տների մասին, որոնք ևս նպաստում են լճի ջրի աղտոտմանը։
Նշենք, որ ԱԺ–ում Սևանի խնդիրների վերաբերյալ քննարկումը նախաձեռնել է «Բարգավաճ Հայաստան» խորհրդարանական խմբակցությունը: Քննարկման բացմանը խմբակցության անդամ Նաիրա Զոհրաբյանը հայտարարեց, որ մասնակցության հրավերներ են ուղարկվել Շրջակա միջավայրի և առողջապահության նախարարներին, որոնք, սակայն, չեն եկել ԱԺ։ Զոհրաբյանին տեղեկացրին, որ Առողջապահության նախարարությունից քննարկմանը մասնակցում է Հիվանդությունների վերահսկման և կանխարգելման ազգային կենտրոնի գլխավոր տնօրենի տեղակալ Նունե Բակունցը։
Պաշտոնյաները լողում են Սևանում, իսկ մասնագետը նրանց մեղադրում է անգործության համար