ԵՐԵՎԱՆ, 17 հուլիսի — Sputnik. ՀՀ երկրորդ նախագահ Ռոբերտ Քոչարյանի քրգործով 1–ին ատյանի դատավոր Դավիթ Գրիգորյանի աշխատասենյակում երեկ խուզարկություն է տեղի ունեցել։ Sputnik Արմենիայի հետ զրույցում լուրը հաստատեց Հատուկ քննչական ծառայության մամուլի խոսնակ Մարիա Օհանջանյանը։
«Խուզարկությունը կատարվել է մեզ մոտ քննվող քրգործի շրջանակում»,–ասաց նա` հավելելով, որ այս պահին այլ մանրամասներ հայտնել չեն կարող։
Ավելի վաղ Politika.am–ը գրել էր, որ խուզարկությունից հետո դատավորի աշխատասենյակը կնքվել է։
«ՀՔԾ քննիչը ոստիկանությանը կնքել է տվել սենյակը՝ այդ գործողությունը հիմնավորելով այն հանգամանքով, որ հանցանքի վայր է դա։ Թե ինչ հանցանք է և ինչ քրգործ է, դեռևս պարզ չէ։ Արձակուրդից վերադարձած դատավոր Գրիգորյանը զարմանքով է պարզել, որ իր հետ նման բան է տեղի ունենում։ Դատավորին իր փաստաբանի հետ արգելվել է մուտք գործել սեփական աշխատասենյակ»,– գրված է կայքում։
Հիշեցնենք, որ Դավիթ Գրիգորյանն այն դատավորն է, որը, հիմք ընդունելով Արցախի ներկա ու նախկին նախագահների միջնորդությունը, Ռոբերտ Քոչարյանի կալանքը որպես խափանման միջոց փոխելու որոշում էր կայացրել։
Հունիսի 25-ին, սակայն, վերաքննիչ քրեական դատարանը վերացրել էր Արցախի նախկին ու ներկա նախագահների անձնական երաշխավորությունը և որոշել Քոչարյանի նկատմամբ խափանման միջոց կիրառել կալանավորումը։ Դատարանը բեկանել էր նաև գործի վարույթը կասեցնելու և ՍԴ դիմելու որոշումը։