ԵՐԵՎԱՆ, 17 հուլիսի – Sputnik. Երևանում ընթացող մինչև 19 տարեկան ֆուտբոլիստների Եվրոպայի առաջնության երկրորդ տուրում Հայաստանի պատանիների թիմը կրկին պարտություն կրեց։ Առաջին խաղում պարտություն կրելուց հետո Հայաստանի ու Իտալիայի մինչև 19 տարեկանների հավաքականների համար այս հանդիպումն առանցքային նշանակություն էր ստացել: Պարտվողը կորցնում էր խմբից դուրս գալու բոլոր շանսերը:
Պարզ է, որ այս խաղում հաղթողի հիմնական հավակնորդը Իտալիայի թիմն էր, բայց մերոնք բավականին լավ սկսեցին ու շարունակում էին այն մինչև 29-րդ րոպեին Մանոլո Պորտանովայի գոլը սառը ցնցուղի ազդեցություն թողեց մեր թիմի վրա, իսկ երեք րոպե անց Դավիդե Մերոլան կրկնապատկեց հյուրերից առավելությունը: Ի պատիվ մեր հավաքականի նշենք, որ թիմը չդադարեց պայքարել: Բայց միևնույնն է կարգն ու փորձն իրենցն արեցին: Հենց այդ պատճառով էլ երկրորդ կեսում, իտալացիները օգտվելով մեր պաշտպանների սխալից, նոր փոփոխություն մտցրին հաշվի մեջ: Պորտանովան այս խաղում խփեց իր երկրորդ գնդակը:
Այսպիսի պայմաններում էլ մեր հավաքականը փորձեր էր կատարում գոնե մեկ անգամ մրցակցի դարպասը գրավելու: Ու ընդ որում, նման հնարավորություններ հայ ֆուտբոլիստները ունեին, բայց վերջին հարվածը չէր կայանում, իսկ մրցակիցը իր շանսը ձեռքից բաց չթողեց ևս մեկ անգամ: Խաղի ավարտից 20 րոպե առաջ Ջակոմո Ռասպոդորին հաշիվը դարձրեց 4:0 հօգուտ Իտալիայի մինչև 19 տարեկանների հավաքականի:
«Արարատ-Արմենիան» ձախողվեց Շվեդիայում և դուրս մնաց Չեմպիոնների լիգայից
Այսպիսով` կրելով երկու պարտություն Հայաստանի հավաքականը կորցրեց բոլոր հնարավորությունները խմբից դուրս գալու համար: Բայց խմբային փուլում մեր թիմը դեռ մեկ հանդիպում ունի անցկացնելու: Հուլիսի 20-ին Հայաստանի հավաքականի մրցակիցը լինելու են պորտուգալացի հասակակիցները: