ԵՐԵՎԱՆ, 12 հուլիսի — Sputnik. 1000 ժամանակավոր աշխատատեղ` նվազագույնը 600 դոլար աշխատավարձով. Երևանում կառուցվող նոր էլեկտրակայանի աշխատանքների համար այս տարի այսքան աշխատատեղ է նախատեսվում ունենալ։ Այս մասին այսօր հայտնեց ՀՀ տարածքային կառավարման և ենթակառուցվածքների նախարարի տեղակալ Հակոբ Վարդանյանը Երևան ՋԷԿ-ի հարևանությամբ կառուցվող նոր էլեկտրակայանի կառուցման շինարարական փուլի մեկնարկի հանդիսավոր արարողության ժամանակ։
«Սա պետական և մասնավորի գործարք է, որը հնարավորություն կտա հետագայում մեղմել սակագնային ճնշումները։ Կայանն ի զորու է լինելու տարեկան արտադրել 1.8-2 մլրդ կիլովատտ/ժամ էլեկտրաէներգիա, և դրա օգտակար գործողության գործակիցը 53 տոկոս է լինելու։ Այս տարի 1000–ից շատ է լինելու անհրաժեշտ աշխատողների թիվը` ինժեներներ, էլեկտրիկներ, եռակցողներ, իսկ հիմնական աշխատողների թիվը կհասնի 200-250–ի»,–ասաց փոխնախարարը։
Ի դեպ, նոր էլեկտրակայանի կառուցման աշխատանքները մեկնարկել են հունիսի 14–ին և նախատեսվում է, որ դրանք ավարտին կհասցվեն 25 ամիս հետո։ Ծրագրի իրականացման համար կներդրվի 250-300 մլն դոլար։
250 Մվտ հզորությամբ էլեկտրակայանի կառուցման շինարարական փուլի մեկնարկի հանդիսավոր արարողությանը ներկա էր նաև ՀՀ վարչապետ Նիկոլ Փաշինյանը։
ԱԱԾ–ն կքննի էլեկտրաէներգետիկ համակարգում տեղի ունեցած կոլապսը