ԵՐԵՎԱՆ, 7 հուլիսի — Sputnik. Երևանում ծեծկռտուք է տեղի ունեցել, որին մասնակցել են նաև «Վեդի Ալկոյի» սեփականատերն ու նրա որդիները։ Այսօր` հուլիսի 7–ին, ոստիկանության կենտրոնական բաժնի քրեական հետախուզության բաժանմունքի ծառայողները բերման են ենթարկել մի քանի քաղաքացու:
Ինչպես հայտնում է Shamshyan.com–ը, նրանք Երևանի բնակիչներ են՝ 21-ամյա Հրաչյա Նազարյանը, 58-ամյա Մանվել Ղազարյանը, 54-ամյա Գևորգ Ոսկանյանը, 26-ամյա Գառնիկ Ղազարյանը, 24-ամյա Վարդգես Մխիթարյանը, 25-ամյա Արմեն Նազարյանը և 23-ամյա Դավիթ Ղազարյանը: Քաղաքացիները բերման են ենթարկվել Պուշկինի 21/3 հասցեից ժամը 01:25-ի սահմաններում:
Ինչպես պարզ դարձավ, վերոնշյալ ծեծկռտուքի հետևանքով տուժած 2 քաղաքացիներին տեղափոխել են Հերացու անվան թիվ 1 համալսարանական հիվանդանոց։ Նրանցից մեկը ունեցել է քթոսկրի կոտրվածք, գլխուղեղի ցնցում, իսկ մյուսը՝ պարանոցային վնասվածք: Բժիշկներին հաջողվել է փրկել վիրավորների կյանքը,նրանք այս պահին գտնվում են բժիշկների հսկողության տակ: Նախնական տեղեկություններով տուժածների վրա հարձակվողներից մեկը հայտնի գործարար, «Վեդի Ալկոյի» սեփականատեր Մանվել Ղազարյանն է եղել, իր երկու որդիների՝ Դավիթի և Գառնիկի հետ : Փաստի առթիվ ոստիկանության կենտրոնական բաժնի հետաքննչական բաժանմունքում նյութեր են նախապատրաստվում: