ԵՐԵՎԱՆ, 5 հուլիսի — Sputnik. ՀՀ նախագահ Արմեն Սարգսյանը շնորհավորական ուղերձ է հղել Սահմանադրության օրվա առթիվ: Այս մասին հայտնում է նախագահի մամուլի ծառայությունը։
«Հայ ժողովուրդը, հիմք ընդունելով Հայաստանի անկախության մասին հռչակագրում հաստատագրված հայոց պետականության հիմնարար սկզբունքները և համազգային նպատակները, իրականացրած ինքնիշխան պետության վերականգնման իր ազատասեր նախնիների սուրբ պատգամը, նվիրված հայրենիքի հզորացմանը և բարգավաճմանը, ապահովելու համար սերունդների ազատությունը, ընդհանուր բարեկեցությունը, քաղաքացիական համերաշխությունը, հավաստելով հավատարմությունը համամարդկային արժեքներին, ընդունում է Հայաստանի Հանրապետության Սահմանադրությունը»,– նշված է նախագահի ուղերձում։
Սարգսյանը հիշեցնում է, որ հայ ժողովուրդն իր այս հավատամքն է ամրագրել 1995թ. հուլիսի 5-ին հանրաքվեով ընդունված Սահմանադրության նախաբանում։ Այնուհետև ՀՀ Սահմանադրությունը երկու անգամ արմատական փոփոխությունների է ենթարկվել` հավատարիմ մնալով այդ հավատամքին։
ՀՀ նախագահն ավելի շատ է գործուղման գնում, քան նախատեսված էր բյուջեով
«Հենց Սահմանադրության 1-ին հոդվածով է որոշված պետության մեր տեսլականը` հռչակելով Հայաստանի Հանրապետությունը որպես ժողովրդավարական, իրավական և սոցիալական պետություն: Այս անփոփոխելի դրույթն իրականում զուտ հռչակագրային բնույթ չունի: Այն ամրագրված է որպես կարևորագույն սկզբունք, արժեք, նպատակ, իրավական և հասարակական իդեալական ստանդարտ, որին շարունակական կատարելագործման միջոցով, առօրյա աշխատանքով և վարքագծով պետք է մշտապես ձգտեն ինչպես պետական մարմինները, այնպես էլ Հայաստանի Հանրապետության յուրաքանչյուր քաղաքացի»,– նշված է ուղերձում։
Սարգսյանի խոսքով` բոլորս հավասար ենք Սահմանադրության առջև, բոլորս պետականության կրողն ենք, նրա մասնիկը, ուրեմն նաև՝ Սահմանադրության պահապանները մեր գործողություններով, վարքով և մեր մտածելակերպով։
«Նույնիսկ ամենակատարյալ ձևակերպումներ պարունակող Սահմանադրությունը կվերածվի լավագույն դեպքում արժեք չունեցող մի փաստաթղթի, եթե այն անբարեխիղճ մեկնաբանվի կամ կիրառվի»,– նշված է ուղերձում:
ՀՀ նախագահն արձանագրում է, որ Սահմանադրությունը ժամանակի մարտահրավերների ու հրամայականների պայմաններում ապրող և զարգացող իրավական փաստաթուղթ է, հետևաբար, Սահմանադրության ցանկացած փոփոխություն պետք է հիմնված լինի իրավունքի գերակայության սկզբունքի վրա և բխի իրավունքի ընդհանուր սկզբունքներից՝ նպաստելով պետության արագ, անցնցում, բնականոն, կայուն և շարունակական զարգացմանը:
Սարգսյանի համոզմամբ` բոլոր ժամանակներում Սահմանադրությունը պետք է մնա հասարակության, ժողովրդի, քաղաքացիների համախմբող առանցք։
Միայն Սահմանադրությամբ լիարժեքորեն ապրող երկիրը, Սահմանադրությունը հարգող իշխանություն և հասարակություն ունեցող պետությունը կարող է զարգանալ և հաստատուն տեղ զբաղեցնել օրեցօր ավելի բարդ ու փոփոխություններով ապրող աշխարհում։