ԵՐԵՎԱՆ, 3 հուլիսի — Sputnik. ՀՀ արտգործնախարար Զոհրաբ Մնացականյանը վաղը` հուլիսի 4-ին, աշխատանքային այցով կմեկնի Արցախ։ Այսօր հրավիրված ճեպազրույցի ժամանակ այս մասին հայտնեց ՀՀ ԱԳՆ մամուլի քարտուղար Աննա Նաղդալյանը։
«Այցի շրջանակում նա կհանդիպի Արցախի նախագահ Բակո Սահակյանի, ԱԺ խոսնակ Աշոտ Ղուլյանի, ԱԳՆ ղեկավար Մասիս Մաիլյանի հետ», – ասաց Նաղդալյանը։
Նրա խոսքով` ՀՀ ԱԳՆ ղեկավարը ղարաբաղյան հակամարտության բանակցային գործընթացի հետ կապված հարցեր կքննարկի Ստեփանակերտում։
Նաղդալյանը նշեց, որ նման այցերը կանոնավոր բնույթ ունեն, որպես կանոն` անցկացվում են Ադրբեջանի արտգործնախարարի հետ հանդիպելուց առաջ և հետո։
ՀՀ ԱԳՆ մամուլի քարտուղարն ավելացրեց, որ դա արվում է նրա համար, որպեսզի Ստեփանակերտն առավելագույնս ներգրավվի բանակցային գործընթացում։
«Սակայն դա որևէ կերպ չի կարող փոխարինել բանակցություններում Ստեփանակերտի անմիջական մասնակցությանը», – ընդգծեց նա։
Հիշեցնենք, որ Հայաստանի և Ադրբեջանի արտգործնախարարներ Զոհրաբ Մնացականյանն ու Էլմար Մամեդյարովը հերթական հանդիպումն անցկացրին հունիսի 20-ին Վաշինգտոնում։ Բանակցությունների արդյունքում ԵԱՀԿ ՄԽ–ն համանախագահները հայտարարություն տարածեցին, որում ափսոսանք հայտնեցին հակամարտության գոտում վերջին կորուստների կապակցությամբ։