ԵՐԵՎԱՆ, 1 հուլիսի — Sputnik. ՀՀ վարչապետ Նիկոլ Փաշինյանի կարգադրությամբ ձևավորված աղետի գոտում ժամանակավոր կացարանների գույքագրման աշխատանքային խումբն ավարտել է իր գործունեությունը Գյումրիում, ինչպես նաև Արագածոտնի, Շիրակի մարզերի մի շարք բնակատեղիներում։ Այս մասին այսօր կայացած մամուլի ասուլիսի ժամանակ տեղեկացրեց ՀՀ քաղաքաշինության կոմիտեի նախագահ Վահագն Վերմիշյանը։
Նրա խոսքով` խումբը մեծածավալ աշխատանք է իրականացրել և ամբողջությամբ գույքագրել է տնակները, հստակ հաշվարկել, թե աղետի գոտում բնակարան ստանալու քանի շահառու կա։ Այդ տվյալների համաձայն`2008 թվականին 5396 մարդ ստացել է երկրաշարժի հետևանքով տուժածի կարգավիճակ և հերթագրվել բնակարան ստանալու համար։
«Տարիների ընթացքում նրանց քանակը նվազել է, մնացել է ընդամենը 457 շահառու, որոնք դեռ բնակարան չեն ստացել։ Սակայն մինչև 2020 թվականը կառավարությունը մտադիր է ավարտել այս գործընթացը և այդ նպատակով արդեն իսկ 3 միլիարդ դրամ է առանձնացրել», – ասաց կոմիտեի նախագահը։
Փաշինյանը զայրացավ. 30 տարի անց աղետի գոտու անօթևանների թիվը հայտնի չէ
Տնակների գրանցման արդյունքները ներկայացնելով` Վերմիշյանը հայտնեց, որ հանձնաժողովը գրանցել է ժամանակավոր կացարանի 7219 միավոր, որոնցից 3530 Շիրակի, 3531–ը` Լոռու և 558–ը` Արագածոտնի մարզում։ Այդ շինություններում շուրջ 25 հազար մարդ է ապրում։ Նրանք տարբեր պատճառներով շահառուներ չեն, սակայն Վերմիշյանը հայտնեց, որ մի քանի սցենար է պատրաստել տվյալ անձանց բնակարանային խնդիրները լուծելու համար և մտադիր է ներկայացնել կառավարության հաստատմանը։ Անձամբ նա հավանել է Նորվեգիայի փորձը, որտեղ չունևոր ընտանիքներին սոցիալական բնակարան է տրամադրվում սիմվոլիկ վարձավճարով։
Չարաշահումներ`անօթևաններին բնակարան տալու գործընթացում. 4 անձի մեղադրանք է առաջադրվել
Վերջին 30 տարվա ընթացքում Սպիտակի ավերիչ երկրաշարժից տուժած ընտանիքների բնակարանային խնդրի լուծման համար ավելի քան 8 մլն դոլար է հատկացվել։ Լուծվել է 66 400 ընտանիքի բնակարանային հարցը։ Սակայն սրանով անօթևան մնացածների խնդիրն ամբողջությամբ չի լուծվել։ «Թավշյա հեղափոխությունից» հետո կառավարությունը որոշել էր վերջնական գրանցել և գույքագրել տնակները և առավելագույնս արագ լուծում տալ այդ խնդրին։