ԵՐԵՎԱՆ, 1 հուլիսի — Sputnik, Արմենուհի Մխոյան. Քաղաքի մուտքի մոտ գյումրեցիները դհոլ-զուռնայով ու կենացներով դիմավորեցին այսօր Մինսկից վերադարձած չեմպիոններ Արթուր Հովհաննիսյանին և Հովհաննես Բաչկովովին:
Մարզիկներին դիմավորելու էին եկել ոչ միայն հարազատներն ու ընկերները, այլ նաև մարզային ու քաղաքային իշխանությունների ներկայացուցիչները: Շիրակի մարզի բռնցքամարտի ֆեդերացիայի նախագահ, Գյումրու քաղաքապետ Սամվել Բալասանյանն լրագրողների հետ զրույցում ասաց, որ նման հաջողության երկար էր սպասել: «Այս փոքր քաղաքում 3 չեմպիոն՝ սա իրոք ուրախանալու առիթ է: Գյումրեցի մարզիկները ևս մեկ անգամ ապացուցեցին՝ Գյումրին մարզական քաղաք է»,-նշեց Սամվել Բալասանյանը: Sputnik Արմենիայի այն դիտարկմանը, թե գյումրեցիները կատակում են, որ Գյումրիում չեմպիոն դառնալը գրիպի վարակ է, Սամվել Բալասանյանը ծիծաղելով հաստատեց՝ «վարակը ոչ միայն քաղաքի երիտասարդների շրջանում է տարածվել, այլ նաև հարևան համայնքներում»:
Երիտասարդ մարզիկ Արթուր Հովհաննիսյանը անկեղծանում է՝ սա իր համար այս պահին ամենամեծ հաղթանակն է: «Շատ մրցումների եմ մասնակցել ու շատ հաղթանակներ եմ ունեցել, բայց այս հաղթանակը իմ կյանքում ամենակարևորն էր ու երազանք, որն արդեն իրականացավ։ Բայց ես չեմ բավարարվի միայն սրանով»,-նշեց Արթուրը, հավելելով, որ հաղթանակը ծնողներին է նվիրում:
Հովհաննես Բաչկովովին դիմավորելու էին եկել նաև կինն ու զավակները՝ 1 ու կես և չորս տարեկան որդիները: Չեմպիոնն ասում է՝ նախադրյալներ կան, որ որդիներն իր ճանապարհն են ընտրելու, նրանք սիրում են բռնցքամարտիկի ձեռնոցները հագնել ու կռվել: «Ամենաշատը նրանց էի կարոտել: Գնացել էինք հաղթելու նպատակով ու ուրախ եմ, որ դա կարողացանք իրականացնել»,-նշեց Հովհաննես Բաչկովովը՝ հաստատելով, որ լավ մարզիկների հետ «հաշվի են նստում»՝ անկախ քաղաքից ու երկրից:
Հավելենք, ամփոփելով կիսամյակը, Շիրակի մարզպետարանի սպորտի վարչության պետ Վաչիկ Վարդանյանը տեղեկացրեց՝ մարզական տարվա առաջին կիսամյակի արդյունքներով Շիրակի մարզիկները Աշխարհի և Եվրոպայի առաջնություններում և գավաթի խաղարկություններում նվաճել են 35 մեդալ: Սա մեծ ցուցանիշ է, բայց այս թիվն ավելացնելու բոլոր նախադրյալները կան:
Հիշեցնենք` Եվրոպական խաղերից հայ մարզիկները 19 մարզաձևից 9-ում նվաճել են 11 մեդալ` 5 ոսկե, 3 արծաթե ու 3 բրոնզե:
Ոսկե մեդալով հայրենիք են վերադարձել բռնցքամարտիկներ Հովհաննես Բաչկովն ու Արթուր Հովհաննիսյանը, սամբիստ Տիգրան Կիրակոսյանը, ըմբիշ Արթուր Ալեքսանյանը և մարմնամարզիկ Արթուր Դավթյանը:
Նշենք, որ Մինսկի խաղերին մասնակցած ըմբիշները դեռ Հայաստանչեն վերադարձել. նրանք մեկնել են հավաքների և, ամենայն հավանականությամբ, հայրենիք կվերադառնան 14 օր անց։