ԵՐԵՎԱՆ, 30 հունիսի-Sputnik. Ղազախստանում անկարգությունները սկսվել են այն բանից հետո, երբ այնտեղ աշխատող Լիբանանի քաղաքացին հրապարակել է մի աղջկա հետ արված լուսանկար։ Լուսանկարում տղայի ձեռքում ռադիոկապի սարք է, որի ալեհավաքը կպչում է աղջկա շուրթերին։
Sputnik Ղազախստանի հաղորդմամբ՝ դրանից հետո Թենգիզ գյուղում գտնվող 3GI գործարանի մոտ հազար աշխատող գործադուլ է հայտարարել։ Աշխատողները լուսանկարը համարել են վիրավորական, հայտարարել են գործադուլ և սկսել են ծեծի ենթարկել օտարերկրացի աշխատակիցներին։ Մի քանի մարդ վնասվածք է ստացել։
Դեպքի վայր են ժամանել Ղազախստանի բարձրաստիճան պաշտոնյաներ։
Որոշ ժամանակ անց լիբանանցի Էլի Դաուդը ներողություն է խնդրել ղազախներից լուսանկարը հրապարակելու համար։
Նա աշխատում է Ղազախստանի Consolidated Contracting Engineering & Procurement S.A.L. Offshore (CСЕР) ընկերությունում՝ որպես լոգիստիկայի գծով ադմինիստրատոր։