ԵՐԵՎԱՆ, 30 հունիսի — Sputnik. Ոստիկանության կենտրոնական բաժնի հետաքննչական բաժանմունքում հարուցվել է քրեական գործ Երևանում իշխանության ներկայացուցչի նկատմամբ բռնություն կատարելու փաստով: Այս մասին տեղեկացնում է shamshyan.com-ը։ Ըստ տեղեկությունների՝ հունիսի 28-ին, ժամը 20:50-ի սահմաններում, ոստիկանություն ահազանգ է ստացվել Երևան քաղաքի բնակիչ, 49-ամյա Անուշ Դ.-ից։ Նա հայտնել է, որ Բյուզանդի փողոցում գործող «Դայմոնդ» ռեստորանային համալիրում իր մոտից գումար է կորել։ Ահազանգով ռեստորան են ժամանել ոստիկանության մի քանի ծառայողներ, որոնց արդեն տեղում Անուշ Դ-ն տեղեկացրել է, որ ռեստորանում իրեն ծեծի են ենթարկել:
Այս տեղեկությունը ստանալուց հետո դեպքի վայր են ժամանել ոստիկանության օպերլիազորներ, որոնց Անուշ Դ-ն հաղորդել է, որ գումարի հետ կապված խնդիր է ունեցել ռեստորանի տնօրեն, Երևանի բնակիչ, 54-ամյա Նարինե Չարչյանի հետ, որն էլ իր նկատմամբ բռնություն է գործադրել: Խնդիրը պարզաբանելու նպատակով ոստիկանները Ն. Չարչյանին հրավիրել են ոստիկանության կենտրոնական բաժին, ինչից հետո Ն. Չարչյանը հայհոյանքներ է հնչեցրել օպերլիազոր Կարեն Այվազյանի հասցեին, վիրավորել նրան, այնուհետև հարձակվել է նրա վրա, քաշել ու պատռել է նրա շապիկը, ճանկռել պարանոցը: Մյուս օպերլիազոր Դ. Դավթյանը փորձել է հանդարտեցնել իրավիճակը, սակայն Ն. Չարչյանին օգնելու նպատակով 3 հոգի հարձակվել են Դ. Դավթյանի վրա, հրել մի կողմ և պահանջել են, որ ոստիկաններն ազատեն տարածքը:
Ժամը 22:50-ի սահմաններում դեպքի վայրի ժամանած ոստիկանները ռեստորանից ոստիկանության կենտրոնական բաժին են բերման ենթարկել Ն. Չարչյանին, 24-ամյա Խաչիկ Հարությունյանին, 49-ամյա Վահագն Հարությունյանին, 62-ամյա Արման Մկրյանին, 36-ամյա Արսեն Պողոսյանին և 32-ամյա Վահե Տեր-Եսայանին:
Ըստ shamshyan.com-ի տեղեկությունների՝ ոստիկանությունում Անուշ Դ.-ն հայտնել է, որ նույն օրը ժամը 21:00-ի սահմաններում Ա. Պողոսյանը, ուժ գործադրելով, իր կամքին հակառակ, իրեն տարել է ռեստորանի հանդերձարան, այնուհետև ռեստորանի տնօրեն Ն. Չարչյանը, Ա. Պողոսյանը և անվտանգության աշխատակից ներկայացած ոմն Գրիգորը շուրջ 20 րոպե իրեն պահել են հանդերձարանում, այդ ընթացքում ծեծի են ենթարկել իրեն։
Նախնական տեղեկություններով՝ Վ. Տեր-Եսայանը, Ա. Մկրյանը, Ա. Պողոսյանը, Վ և Խ. Հարությունյանները բաց են թողնվել, իսկ Ն. Չարչյանը հետաքննիչի որոշմամբ ձերբակալվել է և տեղափոխվել է ոստիկանության Երևան քաղաքի վարչության ձերբակալվածների պահման վայր:
Ըստ շրջանառվող լուրերի՝ Ն. Չարչյանը «Դայմոնդ» ռեստորանային համալիրի տնօրենն է, բերման ենթարկվածներից Խ. Հարությունյանը «Բերկուտ» ՍՊԸ-ի հիմնադիր տնօրենն է, Վ. Հարությունյանը «Բերկուտ ԵԳՀ քոլեջ» ՍՊԸ-ի տնօրենն է, Ա. Մկրյանը «Դայմոնդ» ռեստորանի դիջեյն է, Ա. Պողոսյանը «Դայմոնդ» ռեստորանի մենեջերն է, իսկ Վ. Տեր-Եսայանը «Դայմոնդ ՏԵՏ» տնօրենն է: