ԵՐԵՎԱՆ, 29 հունիսի – Sputnik. Հանրահայտ երգչուհի Սիրուշոն դարձել է լուսահոգի Վարդուհի Վարդանյանի որդու և նրա հարսնացուի կնքամայրը։ Նա այս մասին գրել է Instagaram–ի իր էջում և լուսանկար հրապարակել փեսացուի հետ։
«Ամենահուզիչ օրերից… երեկ ինձ անչափ հարազատ մարդու՝ Վարդուհի Վարդանյանի որդու՝ Ռուբենի նշանադրությունն էր: Նա ստեղծեց իր նոր ընտանիքը… Ինձ համար էլ չափազանց պատասխանատու ու կարևոր է այն, որ դարձա այդ գեղեցիկ ընտանիքի կնքամայրը….»,– լուսանկարին կից գրել է Սիրուշոն։
Հիշեցնենք` երկու օր առաջ` հունիսի 27-ին, Վարդուհի Վարդանյանի ծննդյան օրն էր։ Նա կդառնար 43 տարեկան։
Սիրուշոն և Լևոն Քոչարյանը նշել են ամուսնության 10 տարին. լուսանկար
2006-ի հոկտեմբերի 14-ին Վարդուհին իր գործընկերների հետ համերգային ծրագրով մեկնում էր Ալավերդի, բայց նրանք ստիպված էին ուշ գիշերին վերադառնալ, քանի որ հաջորդ առավոտյան Վարդուհին նոր համերգաշարով պիտի մեկներ Մարտունի, որից հետո` Նոր Հաճն։ Մարտունուց վերադառնալու ժամանակ մառախուղի ու անձրևների հետևանքով անանցանելի դարձած ճանապարհին Վարդուհին չի նկատում շրջադարձը, և Սևան-Մարտունի-Գետափ մայրուղու 17-րդ կիլոմետրում մեքենան կորցնում է կառավարումն ու շրջվում:
Մեքենայի ուղևորներ Եղիշե Վերդյանն ու Արման Խաչատրյանը տարբեր աստիճանի մարմնական վնասվածքներով տեղափոխվում են հիվանդանոց, իսկ Վարդուհու կյանքը փրկել չի հաջողվում:
2006-ին «Ազգային Երաժշտական Մրցանակաբաշխության» ժամանակ Վարդուհուն հետմահու շնորհվում է «Հայաստանի լավագույն երգչուհու» կոչում:
Նույն թվականին «Ազգային Երաժշտական Մրցանակաբաշխության» կոմիտեի որոշմամբ սահմանվում է Վարդուհու անվան ամենամյա հատուկ մրցանակ:
Անցել եմ ամբողջ ավանդական ուղին․ ինչպես են ծանոթացել և ամուսնացել Լևոնն ու Սիրուշոն
2006-ին հիմնադրվում է «Վարդուհի Վարդանյան Հիմնադրամը», որի միջոցներով կյանքի են կոչվում Վարդուհու անավարտ գործերը: Հիմնադրամի կազմակերպչական հարցերով սկսում է զբաղվել Վարդուհու քույրը` Քրիստինեն: Հիմնադրամի և երգչուհի Սյուզան Մարգարյանի նախաձեռնությամբ կազմակերպվում է համերգ-երեկո Վարդուհու հիշատակին նվիրված, որն անվանվում է «Դեպի երկինք»: