ԵՐԵՎԱՆ, 29 հունիսի — Sputnik. 25 տարեկան պայմանագրային զինծառայողին դանակահարած 19-ամյա քաղաքացին ինքնակամ ներկայացել է ոստիկանության բաժանմունք և խոստովանական բացատրություն տվել։ Այս մասին տեղեկացնում են ոստիկանության մամուլի ծառայությունը։
Հունիսի 27-ին, ժամը 23.05-ին, ոստիկանության Վաղարշապատի բաժնում հիվանդանոցից հաղորդում է ստացվել, որ «կրծքավանդակի ձախ կեսի կտրած-ծակած վերք» ախտորոշմամբ հիվանդանոց է դիմել 25-ամյա մի քաղաքացի: Պարզվել է, որ հունիսի 27-ին, ժամը 22.30-ի սահմաններում, Շահումյան գյուղի սկզբնամասում ծագած վիճաբանության ընթացքում, 19-ամյա մի քաղաքացի ձեռքին եղած դանակով հարվածել է տուժածի կրծքավանդակին։
Sputnik Արմենիան ավելի վաղ հայտնել էր, որ տուժողը պայմանագրային զինծառայող է, հրաձիգ։
«Միջադեպի մասնակիցները ոստիկանությունում բացատրություններ են տվել։ Մասնակից այլ անձանց հայտնաբերելու ուղղությամբ ձեռնարկված միջոցառումների արդյունքում, հունիսի 28-ին, ժամը 03.15-ին, բացատրական աշխատանքի շնորհիվ, 19-ամյա քաղաքացին ինքնակամ ներկայացել է բաժին և տվել խոստովանական բացատրություն»,–նշված է ոստիկանության հաղորդագրության մեջ:
Նշանակվել է դատաբժշկական փորձաքննություն: Կատարվում է քննություն։
Հիշեցնենք, որ բժիշկները վիրահատել էին պայմանագրային զինծառայողին, նրանց հաջողվել է փրկել երիտասարդի կյանքը։
Գյուղում խոսում են, որ հիվանդանոց տեղափոխված երիտասարդի եղբայրը մեքենան արագ է վարել, ինչից հետո գյուղի երիտասարդները նրան նկատողություն են արել, ինչն էլ վեճի թեմա է դարձել։
Պարզաբանումների ժամանակ էլ մասնակիցներից մեկը դանակահարել է երիտասարդին։ Ըստ ոստիկանության` ձեռնարկվում են միջոցառումներ հանցագործության գործիքը հայտնաբերելու ուղղությամբ:
Նշանակվել է դատաբժշկական փորձաքննություն:
Կատարվում է քննություն։