ԵՐԵՎԱՆ, 29 հունիսի — Sputnik. «Բարգավաճ Հայաստան» խմբակցության պատգամավոր Սերգեյ Բագրատյանը նվազագույն աշխատավարձի շեմի բարձրացումը համարձակ քայլ է որակում։ Այսօր նա այդ մասին ասաց լրագրողների հետ հանդիպման ժամանակ։
«Այն, որ կառավարությունը նվազագույն աշխատավարձը 55 000 դրամից 68 000 դրամ դարձրեց, կարծում եմ` կարելի է որպես համարձակ քայլ երակել։ Հաշվի առնելով այն հարկային բեռը, որ կարող էր դրա արդյունքում ունենալ մեր բյուջեն, փորձում էին դա հետաձգել։ Բայց տեսնելով, որ ստվերից ներգրավված միջոցները թույլ են տալիս մի քիչ ավելի համարձակ աշխատել, գնացին նման քայլի»,–ասաց նա։
Ըստ նրա` նվազագույն աշխատավարձի շեմը բարձրացնելը կարևորագույն փոփոխություն էր, որը դրական կազդի հասարակության դրամական միջոցների վրա:
Աշխատավարձերը 2020թ–ին կբարձրանան նաև հիվանդանոցներում. առողջապահության նախարար
Բագրատյանը, սակայն, նշեց, որ լավ օրենքները հաճախ վատ կիրարկման արդյունքում կարող են ոչ արդյունավետ դառնալ։ Դրա համար էլ, ըստ նրա, պետք է ուշադիր հետևել և համապատասխան ենթաօրենսդրական ակտերով լրացնել օրենքի այն բացերը, որոնք փոփոխությունների հետևանքով կարող են առաջանալ հարկային օրենսգրքի փաթեթում։
«Միանշանակ ասել, որ որևէ հարկային փոփոխություն հաջողություն է բերելու, սխալ մոտեցում է։ Զարգացած երկրներում 1 տարի ժամանակ են հատկացնում փոփոխություններին, և եթե փորձը դրական է լինում, նոր միայն այն ներառում են օրենքում։ Կարծում եմ` մենք էլ այդ փորձը պետք է ներդնենք։ Այսինքն` պետք չի միանգամից փոփոխությանն օրենքի տեսք տալ, որպեսզի հետո օրենքները չընդունենք ու «փոշմանենք» »-ասաց նա:
Հիշեցնենք, որ ՀՀ կառավարության հունիսի 27–ի նիստում որոշվեց նվազագույն աշխատավարձը 55 000–ից դարձնել 68 000 դրամ։
Փաշինյանն ասաց` ինչպես ֆեյքերին աշխատավարձ տվողները բոմժեր կդառնան