ԵՐԵՎԱՆ, 27 հունիսի — Sputnik. Ռուսաստանում կազմակերպված «Բանակ-2019» հինգերորդ ռազմատեխնիկական միջազգային համաժողովի ընթացքում Հայաստանը զինամթերքների ձեռքբերման պայմանագրեր է կնքել։ Sputnik Արմենիայի հետ զրույցում այս մասին ասաց ՀՀ պաշտպանության նախարարի մամուլի խոսնակ Արծրուն Հովհաննիսյանը։
«Նոր պայմանագրեր են կնքվել հիմնականում Ռուսաստանի հետ` հարձակվողական նոր զինատեսակների, նոր սերնդի զինամթերքի ձեռքբերման, ինչպես նաև այլ միջոցների մատակարարումների` կառավարման և կապի համակարգերի վերաբերյալ։ Նոր կնքված պայմանագրերի ու պայմանավորվածությունների հիմքով մատակարարումներ կարող են լինել 2019–ին, 2020–ին»,–ասաց նա։
Հովհաննիսյանը հայտնեց, որ զինամատակարարման գործընթացը մշտական գործընթաց է, և այս պահին էլ են որոշակի մատակարարումներ ընթանում։
Անդրադառնալով «Բանակ 2019» համաժողովում Հայաստանի ցուցադրած զինատեսակներին` Հովհաննիսյանը նշեց, որ հիմնականում ցուցադրվել են ռազմաարդյունաբերական ձեռնարկությունների արտադրատեսակները, որոնք ավելի շատ ռադիոէլեկտրոնային, օպտիկական նշանոցներ ու հարմարանքներ են, կառավարման համակարգեր։
«Այցելուները հետարքրքությամբ էին դիտում մեր տաղավարը։ ՌԴ պաշտպանության նախարարն էլ այցելեց հայկական տաղավար»,–ասաց նա։
Հիշեցնենք, որ Մոսկվայում ցուցադրվում էր ավելի քան 2500 միավոր տեխնիկա, մասնակցում էին մոտ 100 երկրի պատվիրակություն, որոնց թվում էր նաև Հայաստանը: Հայաստանից համաժողովին մասնակցում էր պաշտպանության նախարար Դավիթ Տոնոյանի գլխավորած պատվիրակությունը: