Երևանի պետական համալսարանի Միջազգային հարաբերությունների և դիվանագիտության ամբիոնի դոցենտ, պատմական գիտությունների թեկնածու Գրիգոր Բալասանյանը Sputnik Արմենիայի հետ զրույցում անդրադառնալով ՀՀ երկրորդ նախագահ Ռոբերտ Քոչարյանի կալանավորման փաստին, նկատում է, որ Ռուսաստանի նախագահն ու այդ երկրի ղեկավար շրջանակները տարբեր մակարդակներում բազմիցս ընդգծել են, որ ՀՀ երկրորդ նախագահ Ռոբերտ Քոչարյանի հետ Ռուսաստանի ղեկավարությունն ունի նաև անձնական հարաբերություններ։
«Ռոբերտ Քոչարյանի կալանավորումն անկասկած կարող է որոշակի ազդեցություն ունենալ հայ-ռուսական հարաբերությունների վրա»,-կարծում է Բալասանյանը։
Նրա խոսքով, չնայած ընդունված չէ անձնական հարաբերությունները տեղափոխել միջպետական հարաբերությունների դաշտ, այնուամենայնիվ, գիտենք, որ շատ հաճախ միջպետական հարաբերություններում հսկայական դեր ունեն հենց անձնական հարաբերությունները։
«Այդ առումով, կարծում եմ որոշակի հարցադրումներ են առաջանալու, որոնց Հայաստանի իշխանությունները պետք է պատրաստ լինեն պատասխանել»,-ասում է Գրիգոր Բալասանյանը։
Հունիսի 25-ին Վերաքննիչ քրեական դատարանի որոշմամբ Հայաստանի երկրորդ նախագահ Ռոբերտ Քոչարյանը կրկին կալանավորվեց։ Դատարանի որոշմամբ վերացվեց Քոչարյանի նկատմամբ որպես խափանման միջոց ընտրված Արցախի նախկին ու ներկա նախագահների անձնական երաշխավորությունը։ Բացի այդ, դատարանը որոշեց Սահմանադրական դատարան դիմելու և գործի վարույթը կասեցնելու Երևան քաղաքի ընդհանուր իրավասության առաջին ատյանի դատարանի որոշումը բեկանել ու տվյալ դատական գործն ուղարկել նույն դատարան՝ նոր քննության։