ԵՐԵՎԱՆ, 25 հունիսի — Sputnik. Աշխարհաքաղաքական և գլոբալ շուկաների զարգացումների համատեքստում Հայաստանն ունի օդային հաղորդակցությունն արդյունավետ կազմակերպելու կարևոր դերակատարություն։ Այս մասին այսօր ասել է ՀՀ տարածքային կառավարման և ենթակառուցվածքների նախարար Սուրեն Պապիկյանը, որն այցելել է Քաղաքացիական ավիացիայի կոմիտե, շրջայց իրականացրել «Զվարթնոց» օդանավակայանում։ Այս մասին տեղեկանում են տարածքային կառավարման և ենթակառուցվածքների նախարարությունից։
«Մեր օդային հաղորդակցության դերակատարությունը պետք է բխի ինչպես մեր երկրի, այնպես էլ տարածաշրջանի ընդհանուր շահերից»,–ասել է նա։
Նախարարի խոսքով` հարևան պետությունների հետ ոլորտի զարգացմանն ուղղված փոխլրացնող քաղաքականության մշակումը հնարավորություն կտա արդիականացնել ավիացիոն ենթակառուցվածքները, բարձրացնել ՀՀ զբոսաշրջային գրավչությունն ու խթանել տնտեսական ակտիվությունը։
Պապիկյանն աշխատանքային խորհրդակցություն է անցկացրել կոմիտեի նախագահի տեղակալ Արսեն Պողոսյանի և ստորաբաժանումների ղեկավարների մասնակցությամբ։
Կոմիտեի նախագահի տեղակալ Արսեն Պողոսյանը մանրամասներ է հաղորդել երեկ` հունիսի 24-ին, ՀՀ կանոնավոր փոխադրումներ իրականացնող ավիաընկերությունների ներկայացուցիչների հետ հանդիպումից։ Մասնավորապես, նշվել է, որ օրակարգում եղել են ռուս-վրացական օդային փոխադրումների ոլորտում ստեղծված ներկայիս իրավիճակը, Հայաստանի տարածքով ուղևորահոսքերի սպասարկման, չվերթների ավելացման հնարավորությունները։