ԵՐԵՎԱՆ, 24 հունիսի — Sputnik. ՀՀ վարչապետ Նիկոլ Փաշինյանը բոլոր ոլորտներում պարտվում է անցյալի բոլոր իշխանություններին: Այսօր Sputnik Արմենիա մուլտիմեդիոն կենտրոնում կայացած մամուլի ասուլիսի ժամանակ այս մասին ասաց Հայաստանի հանրապետական կուսակցության մամուլի խոսնակ Էդուարդ Շարմազանովը։
«Օրինակ` անվտանգության առումով մեր գործերը չեն փայլում։ 2018–ին ԱԺ–ում Փաշինյանը հայտարարեց, որ ամեն ինչ անելու է, որ Հավաքական անվտանգության կազմակերպության գլխավոր քարտուղարի պաշտոնը մնա ՀՀ–ին։ Հիմա 2019–ն է, ու Հայաստանի գլխավոր քարտուղարի թեկնածուի հարց չեն էլ քննարկել. քննարկում են Բելառուսի թեկնածուի հարցը։ Այսինքն` ՀՀ–ն, Փաշինյանի ջանքերով Խաչատուրովին հետ կանչելով, զրկվեց ՀԱՊԿ գլխավոր քարտուղարի պաշտոնից»,–ասաց նա։
Նրա խոսքով` տարբերություն կա, թե ով է ՀԱՊԿ–ի գլխավոր քարտուղարը` Ղրղըզստանի ներկայացուցի՞չն է, թե՞ մի գեներալ, որն Արցախը գիտի դիրք առ դիրք, որի համար Արցախի խնդիրը ոչ միայն ուղեղի, այլ նաև սրտի խնդիր է: Շարմազանովի բնութագրմամբ` սա առաջին ձախողումն էր։
ՀԱՊԿ գլխավոր քարտուղարի պաշտոնը թափուր է մնացել 2018 թվականի նոյեմբերի 2-ից, երբ հայկական կողմի նախաձեռնությամբ Յուրի Խաչատուրովը հետ է կանչվել ՀԱՊԿ գլխավոր քարտուղարի պաշտոնից: Յուրի Խաչատուրովին մեղադրանք է առաջադրվել Մարտի 1-ի գործի շրջանակում ՀՀ քրեական օրենսգրքի 300.1 հոդվածով:
ՀՀԿ մամուլի խոսնակն անդրադարձավ նաև Փաշինյանի` Իրանում օտարերկրյա գործակալների մասին հայտարարությանը։
«Փաշինյանն ասաց, որ քաղաքական դաշտում կան գործիչներ, որոնք օտարերկրյա գործակալներ են: Եթե իմ երկրում վխտում են օտարերկրյա գործակալներ, և ուժային կառույցները ոչինչ չեն անում, ուրեմն սա քաղաքական անմեղսունակության կամ քաղաքական ջրիկության արդյունք է»,–ասաց նա։
Շարմազանովի խոսքով` օտարերկրյա գործակալների հարցը չլուծած՝ Փաշինյանը հայտարարեց, որ Արցախում ու Հայաստանում կան դավադիր ուժեր, որոնք պատերազմ են հրահրում: Սա, ՀՀԿ մամուլի խոսնակի գնահատմամբ, հակապետական հայտարարություն է: Եթե Ադրբեջանը ռազմական գործություններ սկսի, ապա, Շարմազանովի հավաստմամբ, կարող է դրա պատասխանատվությունը հայկական կողմի վրա դնել։
Փետրվարի 27-28-ին ՀՀ վարչապետ Նիկոլ Փաշինյանը պաշտոնական այցով Իրանի Իսլամական հանրապետությունում էր։ Վերոհիշյալ հայտարարությունը նա արել էր փետրվարի 28-ին` ԻԻՀ հայ համայնքի հետ հանդիպման ընթացքում։
Շարմազանովն անդրադարձավ նաև մայիսի 1-3–ին և հունիսի 7-13-ին Ադրբեջանի ու Թուրքիայի համատեղ զորավարժություններին` հարցնելով, թե ի պատասխան մենք ի՞նչ ենք արել:
«Մեր իշխանությունը հասարակությունը շարունակել է բաժանել սևերի ու սպիտակների, հեղափոխականների ու հակահեղափոխականների, Քաղաքացու օր են նշել, Պրոսպեկտում քյաբաբ–խորոված կերել ու հայտնել, թե ով էլ չի ուզում ուտի` թող գնա ու խաշ ուտի։ Սա խայտառակություն է» ,- ասաց նա։
Հիշեցնենք, որ հունիսի 17-20–ն Արցախի ՊԲ–ն մի շարք զորամասերի և զորատեսակների ներգրավմամբ իրականացրել էր հրամանատարաշտաբային զորավարժություններ:
Համաբանակային կարևորության միջոցառմանն ընդգրկված էին շուրջ 10.000 զինծառայող, 200-ից ավելի հրետանային համակարգ, մոտ 150 զրահատեխնիկա, 50-ից ավելի ՀՕՊ համակարգեր, ավելի քան 400 ավտոտեխնիկա և այլ շարժակազմեր։