ԵՐԵՎԱՆ, 22 հունիսի – Sputnik. Բոլորն էլ ուզում են հանգստանալ արևադարձային որևէ երկրում, բայց շատերը կարծում են, որ նման ուղևորություններն իրենց գրպանի համար չեն։ Sputnik Արմենիան զրուցել է զբոսաշրջային գործակալությունների հետ` պարզելու համար, թե հայաստանցիներն այս տարի որտեղ են նախընտրում անցկացնել հանգիստը և որքան գումար ստիպված կլինեն ծախսել այդ հանգստի համար։
Զբոսաշրջային գործակալությունների տրամադրած տվյալների համաձայն` հայերն ամենից շատ նախընտրում են ամառային հանգիստն անցկացնել Եգիպտոսում։
Ամենահայտնի հանգստավայրերն են Հուրդագան, Էլ Գունան, Շարմ էլ Շեյխը, ինչպես նաև Մակադի Բեյը: Այս վայրերից յուրաքանչյուրն առանձնանում է իր գեղատեսիլ վայրերով և որակյալ հանգստի համար անհրաժեշտ բոլոր հարմարությունների առկայությամբ (ներառյալ ժամանցային և զվարճանքի վայրեր, որտեղ կարելի է փորձել նաև ջրասուզորդի դերը): Էլ – Գունա հանգստավայրը, որ հայտնի է որակյալ հանգստի համար առանձնահատուկ պայմաններով և բարձրորակ ծառայություններով, գնային առումով համեմատաբար թանկ է։ Եգիպտոսի ազգային արժույթը ֆունտն է, սակայն մի շարք վայրերում կարելի է վճարել դոլարով կամ եվրոյով: Այս ամառ Եգիպտոս մեկնողներին առաջարկում են հետևյալ փաթեթը` 2 անձի 7-օրյա ուղևորությունը 750-800 դոլար։
Երկրորդ հորիզոնականում Դուբայն է, որը վերջին տարիների ընթացքում դարձել է ամենահայտնի հանգստավայրերից մեկը։ Դուբայ մեկնելու ամենահարմար ժամանակը ձմեռային ամիսներն են կամ հոկտեմբերից ապրիլ ընկած ժամանակահատվածը: Այս ժամանակահատվածում օդի ջերմաստիճանը 25 °C է, իսկ ջրինը՝ 18-20 °C: Թեև այս շրջանում նաև անձրևներ են լինում, բայց երկար չեն ձգվում: Մինչդեռ ամառային ամիսներին այստեղ ջերմաստիճանը կարող է հասնել մինչև 40-50°С-ի, իսկ խոնավությունը ծովափին՝ 90%-ի:
Դուբայը հրաշալի վայր է համեղ ուտեստների սիրահարների համար: Այստեղ կարելի է համտեսել աշխարհի բոլոր երկրների խոհանոցների ճաշատեսակները: Աշխարհի ամենահայտնի շեֆ խոհարարներն այս քաղաքում իրենց ռեստորանների մասնաճյուղերն ունեն։
Հենց Դուբայում են տեղակայված բազմաթիվ շինություններ, որոնք գրանցված են Գինեսի ռեկորդների գրքում: Դրանց թվում է աշխարհի ամենաբարձր շինությունը` Burj Khalifa–ն՝ իր հանրահայտ ռեստորանով, որը գտնվում է շինության ամենաբարձր կետում, ինչպես նաև նախորդ ռեկորդակիրը` Burj Al Arab–ը, ամենաամուր շինություններից մեկը, որը դիմանում է բազմաթիվ փոթորիկների (Palm Jumeirah Island), աշխարհի մայրցամաքների տեսքով կառուցված արհեստական արշիպելագը (The World), հանրահայտ The Dubai Mall-ը, Արևելքի ամենահայտնի ակվապարկը (Wild Wadi Water Park) և այլն։ Այս ամառ 2 անձի համար ուղևորությունը դեպի Դուբայ կարժենա 1200 դոլար։
Երրորդ հորիզոնականում Հունաստանն է, որը բազմերանգ երկիր է: Ծովային հանգստավայրերից բացի, զբոսաշրջիկներին առաջարկում են ճանաչողական ուղեգրերի մեծ ընտրություն՝ թանգարանների և տեսարժան վայրերի այցելություններով, որոնք ներկայացնում են Հին Հունաստանի հարուստ ժառանգությունը: Ծովափնյա հանգստի սեզոնը Հունաստանում (Կրետե, Ռոդոս) սկսվում է ապրիլի վերջից և շարունակվում մինչև նոյեմբերի սկիզբ: Հանգստի համար ավանդական ակտիվ սեզոնը հուլիսն ու օգոստոսն են, և փաթեթների գներն այդ ընթացքում համեմատաբար բարձր են: Եթե պլանավորում եք հանգիստն անցկացնել հունիսին, ապա համեմատաբար քիչ գումար կծախսեք. դեպի Հունաստան 2 անձի համար ուղևորությունը կարժենա մոտ 2000 եվրո (10 օրվա համար)։
Չորորդ հորիզոնականում Իտալիան է։ Հռոմը համարվում է ոչ միայն Իտալիայի, այլ նաև ամբողջ աշխարհի ամենախոշոր տեսարժան վայրը: Դրա սահմաններում են գտնվում Վատիկան քաղաք-պետությունը, պատմական հուշարձանները: Հռոմի բազմաթիվ տեսարժան վայրերի այցելություններից հետո, եթե նույնիսկ գերհոգնած լինեք, միևնույնն է, չեք կարող անտարբեր անցնել «Հավերժական քաղաքի» առաջնակարգ ռեստորանների կողքով: Ձեզանից յուրաքանչյուրը կգնահատի աշխարհահռչակ կերակրատեսակների մեծ ընտրանին:
Իսկ եթե ունեք անսպառ էներգիա և այն վատնելու մեծ ցանկություն, ապա ձեզ են սպասում գիշերային ակումբները, դիսկոտեկները և զվարճանքի այլ վայրերը: Իտալիայում երկու անձի հանգիստը կարժենա մոտ 2000 եվրո (10 օրվա համար)։
Հինգերորդ հորիզոնականում Իսպանիան է` կրքոտ ֆլամինգոյի, գիշերային վառ կյանքի, արևոտ լողափերի ու տաք ծովի երկիրը, որն ուրախությամբ է ընդունում յուրաքանչյուր զբոսաշրջիկին։
Իսպանիայում հանգստի համար ամենահարմար ժամանակաշրջանն է ապրիլ – հոկտեմբեր ժամանակահատվածը: Մայիս-սեպտեմբերին ուղեգրեր կարող են գնել նրանք, ովքեր ցանկանում են արևը վայելել Բալեարյան կղզիների ափին: Ինչ վերաբերում է Իսպանիայի հյուսիսային ափին, ապա խորհուրդ է տրվում հանգիստն այնտեղ կազմակերպել հունիս – օգոստոս ամիսներին: Այս ամառ Իսպանիայում երկու անձի համար հանգիստը կարժենա մոտ 2000 եվրո (10 օրվա համար)։